Rrjetet sociale u bënë kanal kryesor i komunikimit të enjten në mbrëmje ndërmjet Presidencës dhe Qeverisë lidhur me çështjen e tarifave në import ndaj Shteteve të Bashkuara të Amerikës, teksa u vunë në pah dallimet.
Në një njoftim në “X”, presidentja Vjosa Osmani tha se ka kërkuar nga Qeveria që me vendim të heqë tarifën prej 10%, e cila aplikohet ndaj produkteve nga SHBA-ja.
Kësaj i reagoi ministri Financave Hekuran Murati që u mor me diferencën e ngushtë kohore ndërmjet kërkesës me e-mail nga presidentja dhe publikimit të saj, e se kjo ishte bërë edhe jashtë orarit të punës.
Në një përgjigje për TV Dukagjinin, Ministria e Financave vetëm përsëriti atë që tha kreu i saj, se Kosova ka gatishmëri për “tregti të lirë pa asnjë barrierë tarifore me SHBA-në” dhe se diçka e tillë është diskutuar “qysh në Prill të vitit 2023”.
“Si partnerë e aleatë të përhershëm, synimi ynë është që të rritet vëllimi i këmbimit tregtar, dhe Qeveria e Kosovës e mbështet plotësisht parimin e Presidentit Trump për tregti të lirë e pa barriera dhe fer. Kjo mund të arrihet përmes një marrëveshjeje për tregti të lirë, që do të shërbente edhe si një shkallë shtesë drejt ngritjes e forcimit të marrëdhënieve të forta që tashmë kemi”. –Ministria e Financave.
Ndërsa nga Presidenca nuk pati reagime të reja – pos atyre paraprake nga stafi, që e vlerësuan si skandaloze reagimin e ministrit Murati.
Profesori i Komunikimit, Abit Hoxha, kritikon këtë qasje të institucioneve, duke thënë se qëllimi i shkëmbimit publik ishte më shumë përpjekje “për t’u dukur se cili është më pro-amerikan”.
“Ky komunikimi mes zyrtarëve të lartë të shtetit tonë është më tepër për konsekuencën e këtyre tarifave dhe politikave amerikane ndaj Kosovës, sesa për të rregulluar diçka. Kjo në njëfarë forme është njëfarë loje e fajësimit. Po të ishte e interesuar Qeveria dhe Presidenca këtë punë do ta rregullonin shumë më herët dhe do të kujdeseshin që relacionet me SHBA-në të ishin në nivel më të mirë”, ka thënë Abit Hoxha, Profesor – Media dhe Komunikim.
Heqja e njëanshme e tarifës, në vlerësimin e ish-ministrit të Tregtisë Ismet Mulaj, përveçse nuk do të dëmtonte Kosovën në aspektin ekonomik tregtar për shkak të shkëmbimit të ulët, do të dërgonte mesazh vlerësimi nga Kosova drejt SHBA-së.
“Qeveria do të duhej sot ose nesër maksimalisht ta merrte këtë vendim dhe të tregonte shenja të respektit dhe miqësisë edhe me presidentin Trump, edhe me SHBA-në. Është shumë me rendësi, po shohim veprimet e presidentit Trump, ai i do ato vende ose ato personalitete politike realisht tregojnë shenja respekti për politikat e tij”, ka thënë Ismet Mulaj, Ish-Ministër i Tregtisë.
Më 3 Prill, Shtetet e Bashkuara të Amerikës njoftuan vendosjen e tarifës prej 10% për mallrat nga Kosova, si masë e ndërsjellë. Kosova këtë masë e kishte ndaj SHBA-së ashtu siç e ka për të gjitha shtetet që nuk ka marrëveshje për tregti të lirë.
