Duket se këngëtarja e hitit “One Kiss”, 29 vjeçe, kishte marrë pak kohë pushimi nga turneu i saj botëror “Radical Optimism” për të shijuar disa ditë në qytetin sicilian Palermo, shkruan DailyMail.
Në videon e xhiruar nga ana tjetër e një rruge të ngushtë, shihet Dua e ulur në trotuar, nën diellin italian, duke shijuar një gotë verë dhe një cigare.
Ajo duket e relaksuar, duke qeshur me personin pranë saj – i cili më vonë u zbulua të jetë i fejuari i saj, Callum Turner, 35 vjeç.
Çifti u pa gjithashtu duke shëtitur të përqafuar rrugëve karakteristike të qytetit, me Duan e veshur me një këmishë të bardhë dhe pantallona të shkurtra xhins, teksa reflektonin një afeksion të ndjeshëm për njëri-tjetrin.
Pamjet befasuan fansat, shumë prej të cilëve shprehën habinë e tyre në komente, duke theksuar sa “normale” dhe “tokësore” dukej këngëtarja. “Dhe ajo thjesht është ULUR NË TROTUAR me një gotë verë! Jo ndonjë tavolinë luksoze në restorante të shtrenjta… E dua për faktin se duket kaq e qetë dhe normale, ndryshe nga shumë yje të tjerë në nivelin e saj të famës”, shkroi një ndjekës në TikTok.
Një tjetër komentoi: “Ka nivelin perfekt të famës – pasuri ekstreme, fytyra e marrëveshjeve të mëdha të modës dhe kozmetikës, turne në stadiume – por nuk përndiqet apo mbingarkohet nga fansa si Ariana, Taylor apo Beyoncé.” Të tjerë shtuan: “Si po rri kaq e qetë në publik? E adhuroj!”.
Megjithatë, pati edhe komente kritike ndaj Duas për faktin që po pinte cigare, duke shprehur shqetësime për ndikimin që kjo mund të ketë në zërin dhe karrierën e saj si këngëtare.
“Vështirë ta kuptosh pse njerëzit ende pijnë duhan, sidomos kur janë kaq të rinj”, shkroi një komentues. Tjetër tha: “Pse këngëtarët pijnë cigare?” Ndërsa një tjetër komentoi: “Duhani po ia dëmton zërin, por ndoshta as që i intereson – po shijon momentin”.
Turneu “Radical Optimism”, i cili nisi në muajin maj, e ka çuar deri më tani Duan në Australi dhe më pas në Mbretërinë e Bashkuar, ku muajin e kaluar ajo mbajti koncerte të njëpasnjëshme në stadiumin Wembley.
Turneu do të rifillojë në fillim të gushtit me pjesën në Amerikën e Veriut, përpara se të zhvendoset në Amerikën e Jugut më vonë gjatë këtij viti, dhe do të përfundojë më 5 dhjetor në Mexico City.
Në ndërkohë, Dua po shfrytëzon kohën larg skenës për të kaluar çaste të veçanta me të fejuarin e saj Callum.
Vetëm disa javë më parë, ata u panë duke ndarë puthje pasionante gjatë një udhëtimi romantik në Bregun Amalfi në jug të Italisë, me Duan që tregonte linjat e saj të tonifikuara me bikini me pika.
Në një intervistë të fundit për British Vogue, këngëtarja foli për herë të parë për fejesën dhe për planet e saj me Callum.
“Do të doja të kem fëmijë një ditë. Por gjithmonë mbetet pyetja: kur është koha e duhur? Si do të përshtatet kjo me punën time, me turnetë, dhe sa kohë do të duhet të mungoj? Mendoj se është një nga ato gjëra që do të ndodhin kur t’i vijë koha. I dua fëmijët, por ka shumë më tepër për të rritur një fëmijë sesa vetëm dashuria për ta”.
Duke konfirmuar fejesën e tyre, Dua tha: “Po, jemi të fejuar. Është shumë emocionuese. Ky vendim për të u plakur bashkë, për të ndarë jetën dhe thjesht… nuk e di… për të qenë miqtë më të mirë përgjithmonë – është një ndjenjë vërtet e veçantë”.
