Ministri i Punëve të Brendshme, Xhelal Sveçla ka reaguar për ngjarjen e fundit të ndodhur në Skenderaj, ku janë plagosur dy zyrtarë policorë.
I dyshuar në këtë rast është ish-deputeti i Kuvendit të Kosovës nga radhët e PDK-së, Nuredin Lushtaku.
Sveçla deklaroi se sot publiku i gjerë në vend ishte dëshmitar i një sulmi të paprovokuar dhe të rëndë ndaj institucionit të Policisë.
Ai u ka uruar shërim të shpejtë të dy policëve të plagosur sot, teksa tha se do t’i vizitoj posa të kthehet nga udhëtimi i tij zyrtar në Bruksel.
Ministri Sveçla po ashtu tha se mbetet i bindur se nuk ka asnjë që mund t’i zmbraps ata dhe kolegët e tyre nga misioni që ia jep detyra e vullneti.
Sveçla tha se të gjithë presin që organet e drejtësisë të marrin masa.
Postimi i plotë:
Sot publiku i gjerë në Kosovë ishte dëshmitar i një sulmi të paprovokuar dhe të rëndë ndaj institucionit të Policisë.
Policët e Republikës së Kosovës në ushtrimin legjitim të detyrave publike duhet të jenë paprekshmërisht të papenguar. Ata janë emri konkret i rendit publik. Nuk mund të kemi edhe Republikë edhe mungesë rendi. Ngjarja e sotme përveçse është e patolerueshme ligjërisht e moralisht përbën po ashtu sulm për rendin e Republikës.
I uroj nga zemra shërim të shpejtë dhe të plotë dy policëve të plagosur sot. Do t’i vizitoj nga afër sapo të kthehem nga udhëtimi zyrtar në Bruksel.
Mbes i bindur se nuk ka asgjë që mund t’i zmbraps ata dhe kolegët e tyre nga misioni që ia jep detyra e vullneti.
Unë, por dhe të gjithë qytetarët presim që organet e drejtësisë të marrin masa, sipas ligjeve në fuqi dhe pa ekuivoke për sulmuesit.
