Kapiteni i Kosovës, Amir Rrahmani, është duke e kaluar edicionin e pestë te skuadra e Napolit. Mbrojtësi i qendrës ndihet prej lojtarëve më të vlerësuar te skuadra e madhe italiane.
“Është viti i pestë që jam këtu, jam i lumtur sepse ndihem si një nga liderët në skuadër. Do të thotë që klubi dhe trajnerët që vijnë na japin besim dhe ne duhet të tregojmë nivelin tonë çdo herë. Trajneri na tha se nuk duhej të shikonim renditjen, por vetëm ndeshjen që do të luhej”, ka thënë Rrahmani, shkruan të hënën “Corriere Azzurro”.
Rrahmani ka folur edhe për ecurinë e mirë që është duke e kaluar Napoli këtë edicion në Serie A.
“Shpresojmë të vazhdojmë kështu, shpresojmë të pësojmë më pak gola dhe të ecim përpara si ekip. Është e vështirë të arrish rezultate në botën e futbollit, por të gjithë e nisëm mirë së bashku dhe kur një sezon fillon kështu, qoftë edhe me fat, është më e lehtë të ecësh përpara”, ka deklaruar Rrahmani.
30-vjeçari Rrahmani e fitoi titullin e kampionit të Serie A me Napolin në edicionin 2022/2023.
