Ambasadorët e akredituar në Kosovë kanë dalë nga objekti i Qeverisë së Kosovës, pas qëndrimit prej më shumë se një orë e gjysmë. Bashkë me ambasadorin e Gjermanisë, Jorn Rohde, nga objekti i Qeverisë është parë teksa ka dalë edhe zëvendëskryeministri Besnik Bislimi.
Deri tash, ambasadat nuk kanë dalë me qëndrime për situatën. Përfaqësuesit e Shteteve të Bashkuara të Amerikës, Mbretërisë së Bashkuar, Gjermanisë, Italisë dhe Francës, kanë qenë të heshtur që nga e mërkura.
Ky takim është zhvilluar pas ngjarjeve që kanë zënë vend në veri të Kosovës duke filluar me tensionet pranë objekteve komunale në veri e që kulmoi me kidnapimin e tre policëve kosovarë nga policia serbe në Leposaviq.
Ende nuk dihet se çfarë saktësisht është diskutuar në këtë takim.
