Komisioni Qendror i Zgjedhjeve ka përditësuar statistikat e votave nga diaspora, që kanë votuar në ambasada e konsullata.
Aktualisht, janë numëruar 40 kuti, nga 43 në total.
Lëvizja Vetëvendosje ka fituar 10 mijë e 898 vota.
PDK-ja është e dyta me 1 mijë e 10 vota, kurse LDK-ja ka 1 mijë e 6 vota. Kurse, AAK-ja ka 260 vota.
Në anën tjetër, ka filluar edhe numërimi i votave me postë.
“Mund t’ju konfirmoj se në Qendrën e Numërimit dhe Rezultateve është duke vazhduar numërimi i vendvotimeve të fundit nga votimi në përfaqësi diplomatike dhe tani kemi filluar edhe numërimin e fletëvotimeve nga votimi përmes postës”, ka deklaruar Elezi.
Zëdhënësi i KQZ-së, Valmir Elezi, ka bërë të ditur se pas përfundimit të këtij procesi do të fillojë numërimi i votave të ardhura me postë.
Sipas KQZ-së, nga 69 mijë pako me fletëvotime, janë aprovuar gati 63 mijë zarfe, të cilat pritet të numërohen në ditët në vijim, ndërkaq më pak se pesë mijë janë refuzuar.
Pasi të përfundojë ky numërim, në proces do të përfshihen edhe votat me kusht dhe ato të personave me nevoja të veçanta.
Sipas rezultateve preliminare, që përfshijnë numërimin e votave të rregullta, Lëvizja Vetëvendosje është e para me 40.8 për qind të votave të fituara, pasuar nga Partia Demokratike e Kosovës me 22.05 për qind.
E treta ka dalë Lidhja Demokratike e Kosovës me 17.64 për qind të votave, pasuar nga Aleanca për Ardhmërinë e Kosovës me 7.46 për qind të votave të fituara.
Nga partitë e komunitetit serb, më së shumti vota ka marrë Lista Serbe, përkatësisht 4.62 për qind.
Njohësi i statistikave, Shenoll Muharremi, ka dhënë versionin e tij për numrin e deputetëve në Kuvend.
Ai ka publikuar një matje ku VV-ja, sipas tij, nëse merr 80% të votave në diasporë, siguron 50 deputetë.
Megjithatë, sipas tij, ky variant është më i miri i mundshëm për VV, po jo real.
“Ky është një skenar që është përmendur si skenari më optimist i mundshëm për LVV. Mesguri mundet me qenë varianti më i mirë i mundshëm, por jo real, i LVV-së. Por e kemi testuar cka nënkupton në praktikë me përqindje dhe me ulëse. Sipas simulimit këtu ku 80% të votave nga dispora fiton LVV, atëherë shkon në 50 deputetë. PDK 23. LDK 19 dhe AAK 8. Pakicat 20”, shkruante ai.
