Kryeministri në largim Albin Kurti dhe Qeveria e Kosovës po thonë se Serbia po përpiqet ta sabotojë formimin e institucioneve të Kosovës duke i joshur, kërcënuar dhe shantazhuar deputetët nga radhët e pakicave.
Kurti të mërkurën u takua me zëvendësen e tij në detyrë dhe kryetaren e Partisë së Re Demokratike boshnjake, Emilija Rexhepin, e cila, siç tha Zyra e Kryeministrit, “konfirmoi gatishmërinë e plotë për vazhdim të bashkëpunimit” me LVV-në.
Po atë ditë, takimet i vijoi duke e pritur në zyrën e tij në qeveri edhe ministrin në detyrë për Komunitete dhe Kthim dhe kryetarin e Partisë për Liri, Drejtësi dhe Mbijetesë, Nenad Rashiqin. Edhe ai, sipas ZKM-së, “e përsëriti mbështetjen e tij ndaj kryeministrit Kurti për formimin e qeverisë së re dhe vazhdimit të bashkëpunimit të frytshëm edhe në mandatin e ardhshëm”.
Më pas u takua edhe me ministrin në detyrë të Administrimit të Pushtetit Lokal dhe kryetarin e partisë egjiptiane Iniciativa e Re Demokratike e Kosovë, Elbert Krasniqin.
Me këta të tre, tha se do ta vijonte partneritetin “edhe në katërvjeçarin e ardhshëm”.
Edhe ditën pasuese Kurti i vijoi diskutimet me deputetë të zgjedhur, përfaqësues politikë të komunitetit boshnjak, egjiptian, turk, rom, ashkali e goran. U takua me ministrin në detyrë të Zhvillimit Rural, kryetarin e Partisë Demokratike Turke të Kosovës, Fikrim Damkën, kryetarin e Partisë Liberale Egjiptiane, Veton Berishën, kryetaren e partisë boshnjake Unioni Socialdemokrat, Duda Baljen, kryetarin e Partisë së Romëve të Bashkuar të Kosovës, Albert Kinollin, kryetarin e Koalicionit Vakat, Rasim Demirin, kryetarin e Partisë Unike Gorane, Adem Hoxha, kryetarin e Partisë së Ashkalinjëve për Integrim, Etem Arifin e deputetin e zgjedhur nga ky subjekt, Artan Asllanin.
Pas takimeve me ta, Kurti shkroi në Facebook se “përgjegjësia na takon neve” për formimin e qeverisë, ndërsa përmendi përfshirjen, pjesëmarrjen, angazhimin e kontributin thelbësor të komuniteteve joshumicë. Diskutimet me ta, i përshkroi si të hapura”.
Por, të dielën pas disa arrestimeve të katër oficerëve serbë që në Kosovë ishin si “pelegrinë”, Kurti tha se Serbia po i vazhdon përpjekjet për sabotimin e konsolidimit të institucioneve.
Fillimisht, për këtë pati një njoftim nga Qeveria e Kosovës, në faqen e saj në facebook.
“Serbia tash po ndërhyn te disa prej deputetëve të komuniteteve joshumicë e joserbë, që ta sabotojë themelimin e institucioneve të reja të legjislaturës së nëntë”, u tha aty.
“Me kërcënime e joshje, dhe sidomos me shantazhe, ajo po orvatet të nxis tensione ndëretnike e ndërpartiake në Kosovë dhe ta destabilizojë Kosovën. Kjo paraqet ndërhyrje flagrante ndaj sovranitetit shtetëror, funksionimit demokratik dhe integritetit institucional të vendit tonë”, vazhdoi më tej komunikata në faqen e Qeverisë.
Kurti, pak më vonë, të dielën i bëri jehonë të njëjtës çështje.
“Në shënjestër janë disa deputetë të pakicave joserbe. Institucionet e sigurisë kanë informacion të konfirmuar lidhur me këtë, dhe kjo ishte njëra ndër çështjet që shqyrtuam në mbledhjen e sotme të Këshillit të Sigurisë së Kosovës”, shkroi Kurti.
Sido që të jetë, Kurti nuk ka zbuluar asgjë nga përmbajtja dhe e as nuk ka treguar nëse do të t’i ftojë ata/ato deputetë të pakicave jo serbe në bisedime për formimin e institucioneve.
