Zgjimi natën midis orës 2 dhe 4 të mëngjesit është i zakonshëm dhe shumë njerëz përballen me këtë problem. Hulumtimet tregojnë se pas katër deri në pesë orësh gjumë, ne hyjmë në një fazë më të lehtë gjumi, kështu që ka më shumë të ngjarë të zgjohemi nga diçka. Nëse shkoni në shtrat më herët në mbrëmje, shanset për ndërprerje të gjumit në orët e para të mëngjesit janë edhe më të mëdha.
Dieta mund të luajë një rol të madh në cilësinë e gjumit. Dr. Mariyam H.Malik, një mjeke, shpjegon se mungesa e magnezit, një mineral që ndihmon në relaksimin e muskujve dhe rregullimin e neurotransmetuesve, mund të çojë në çrregullime të gjumit. Ajo gjithashtu paralajmëron kundër kafeinës, vakteve të rënda, alkoolit dhe sheqerit. “Një dietë e pasur me sheqer dhe karbohidrate të rafinuara mund të shkaktojë luhatje të sheqerit në gjak, të cilat mund të çojnë në zgjim gjatë natës”,-thotë ajo.
Lisa Artis e organizatës bamirëse The Sleep Charity ndan një pikëpamje të ngjashme. Ajo thotë se një rënie e sheqerit në gjak nuk do të shkaktojë domosdoshmërisht uri, por mund të shkaktojë zgjime natën. “Për të zvogëluar zgjimet në orët e para të mëngjesit, provoni alternativa për vaktin ose ushqimin tuaj të fundit në mbrëmje”, këshillon Artis. Ajo rekomandon shmangien e ushqimeve dhe ëmbëlsirave të pasura me karbohidrate, dhe në vend të kësaj të zgjidhni ushqime të pasura me proteina dhe magnez, siç janë gjiza, vezët, farat e kungullit ose mishi i gjelit.
Dr.Malik thekson shmangien e ekraneve para gjumit dhe në vend të kësaj angazhimin në aktivitete qetësuese. “Praktikoni aktivitete qetësuese para gjumit, siç është leximi, dëgjimi i muzikës qetësuese ose praktikimi i teknikave të relaksimit, siç është frymëmarrja e thellë ose meditimi”, rekomandon ajo. Drita blu e emetuar nga pajisjet mund të prishë prodhimin e melatoninës, kështu që ekspertët këshillojnë të shmangni ekranet të paktën dy orë para gjumit. “Provoni të përdorni filtra të dritës blu ose pajisje karikimi në një dhomë të veçantë gjatë natës”.
