Partia Demokratike e Kosovës në opozitë, deklaroi se automjetet me targat ilegale të qytetarëve serbë, nuk mund të lejohen në pafundësi që të qarkullojnë në Kosovë.
Abelard Tahiri, shef i Grupit Parlamentar të PDK-së, i pyetur nga gazetarët për qëndrimin e kësaj force politike, sa i përket afatit për targat, tha se secili veprim qeveritar duhet të koordinohet me SHBA.
“Unë mendoj që secili veprim i qeverisë që duhet të ndërmerret në raport me Serbinë pa dyshim që duhet të jetë në koordinim më SHBA e ky koordinim të rezultojë me respektimin e sovranitetit të republikës”, tha Tahiri, në një deklarim pas mbledhjes së kryesisë së Kuvendit të Kosovës.
“Nuk mund të lejohet në pafundësi shfrytëzimi i targave të tilla dhe çfarëdo veprimi që ndërmerr Qeveria e Kosovës, që respekton sovranitetin e vendit tonë edhe në atë pjesë, padyshim që ka përkrahjen e PDK-së”.
31 tetori është afati i fundit kur qytetarët që bartin në veturat e tyre targa të kohës së Millosheviqit, duhet t’i zëvendësojnë ato me RKS.
Kryeministri Albin Kurti deklaroi gjatë ditës se nuk do të ketë shtyrje të afatit.
