Partia Demokratike e Kosovës i ka bërë thirrje sërish kryeministrit Albin Kurti, që të pranojë ftesën e tyre që zgjedhjet e parakohshme të mbahen më 9 qershor 2024.
Shefi i Grupit Parlamentar të PDK-së, Abelard Tahiri në një konferencë për media, tha se zgjedhjet janë ato që përcaktojnë fatin e një qeverie.
Ai nuk deshi të komentonte mbi rezultatet e sondazheve të fundit.
“Sondazhet janë sondazhe, por zgjedhjet janë ato që përcaktojnë fatin e një qeverie. Ne i bëjmë thirrje edhe kryeministrit Kurti dhe qeverisjes së LVV-së që të mos frikësohen dhe ti përgjigjen pozitivisht ftesës së PDK që më 9 qershor të organizohen zgjedhjet e parakohshme”, tha Tahiri.
Tahiri u shpreh se qeverinë e re do ta formoj kandidati i tyre për kryeministër, Bedri Hamza dhe se për këtë gjë nuk kanë asnjë pikë dyshimi.
“Zgjedhjet janë nevojë për nxjerrjen e vendit nga sanksionet dhe kriza. Ne nuk kemi as edhe një dyshim që mandatari që do ta formoj qeverinë e re të Kosovës do të jetë Bedri Hamza nga PDK. Ne konsiderojmë që vendimi jonë që të shkojmë në zgjedhje më 9 qershor është vendim i duhur”, tha ai.
