Pas vendimit të Bashkimit Evropian për të pezulluar përkohësisht mbajtjen e takimeve në objektin e Qeverisë së Kosovës me kryeministrin në detyrë, Albin Kurti, dhe kabinetin e tij, kanë ardhur edhe reagime të ashpra nga ekspertët e marrëdhënieve ndërkombëtare.
Dritëro Arifi, njohës i çështjeve ndërkombëtare, tha në “Kosova Live” se mënyra e reagimit të qeverisë tregon mungesë të thellë përgjegjësie.
“Mënyra e të reaguarit të qeverisë tregon se këta nuk e kanë idenë as pse qëndrojnë aty, as çfarë përgjegjësie kanë. Kjo letër nuk i drejtohet vetëm qeverisë, por edhe të gjitha partive parlamentare. Nëse do të kishte konkurrencë reale, ata nuk do ta lejonin as fizikisht Kurtin të shkonte në qeveri, sepse është shkelje e Kushtetutës,” tha ai.
Arifi foli edhe për deklaratat e këshilltarit të Kryeministrit, Përparim Kryeziu, si kundërpërgjigje ndaj letrës së BE-së, duke e quajtur atë një qasje të rrezikshme ndaj partnerëve ndërkombëtarë.
“Nëse i thua BE-së se nuk ke nevojë për të, atëherë është njësoj sikur t’i thuash: ‘ktheji të gjitha mjetet financiare sepse s’kam nevojë për ty’. Mund të vijë momenti që BE të na ndalojë të gjitha fondet financiare,” theksoi Arifi.
Arifi shtoj tutje se diplomacia nuk funksionon mbi forcën se ‘’kush është mëq i fortë’’ por mbi zgjuarsinë.
