Drejtori i Zyrës së qeverisë serbe për Kosovën, Petar Petkoviq, mblodhi në Rashkë përfaqësuesit e Listës Serbe të cilët sot morën mandatet e këshilltarëve dhe kryetarëve të komunave në Kosovë.
Petkoviq deklaroi në Instagram se “kthimi i komunave serbe” në veri të Kosovës te populli dhe “forcimi i mëtejshëm i komunave serbe në jug të Ibrit është me rëndësi të madhe” për, siç tha ai, “të ardhmen, prosperitetin dhe mbijetesën e popullit serb”.
Ai gjithashtu deklaroi se “Serbia, e udhëhequr nga Presidenti Vuçiq, është gjithmonë këtu për të mbështetur popullin e saj” dhe, siç tha ai, “siguron ruajtjen e paqes dhe stabilitetit”.
Përfaqësuesit e Listës Serbe, e cila ka mbështetjen e Beogradit zyrtar, sot dhanë betimin për kryetarë dhe këshilltarë komunalë në Mitrovicën e Veriut, Zveçan, Zubin Potok dhe Leposaviq.
Betimin ata e bënë edhe në seancat konstituive të kuvendeve komunale në Graçanicë, Shtërpcë, Novobërdë, Partesh dhe Ranillug, ndërsa seanca e komunës së Kllokotit, ku Lista Serbe fitoi në raundin e dytë të zgjedhjeve, ende nuk është caktuar.
Duhet cekur se kryetarët serbë të komunave me shumicë serbe në Kosovë, betimin e bënë para simboleve të Republikës së Kosovës.
