Avokati i ish-presidentit amerikan i ka dërguar një letër themeluesit të platformës Mark Zuckerberg, ku i kërkon “një takim për të diskutuar kthimin e shpejtë” të Donald Trump në rrjetin social.
“Ne mendojmë se pezullimi i llogarisë së Presidentit Trump në Facebook ka shtrembëruar dhe kufizuar thelbësisht debatin publik”, tha Scott Gast në letrën e dërguar të martën.
Ai i kërkon platformës të “promovojë dialogun e vërtetë, jo të heshtë një kandidat presidencial”.
Ish-udhëheqësi republikan u ndalua nga faqja e rrjeteve sociale për dy vjet pasi mbështetësit e tij sulmuan Kapitolin më 6 janar 2021.
Facebook kishte vlerësuar se Donald Trump nuk mund të kthehej derisa “rreziqet për sigurinë e publikut të jenë zhdukur”.
I pyetur dje nga AFP, një zëdhënës i Metës, kompania mëmë e rrjetit, premtoi një vendim për fatin e ish-presidentit “brenda javëve të ardhshme”.
Trump tashmë është kthyer në Twitter më 19 nëntor 2022, katër ditë pasi shpalli kandidaturën e tij për zgjedhjet presidenciale të vitit 2024. Megjithatë, ai ende nuk ka postuar ndonjë mesazh në atë llogari, duke komunikuar kryesisht përmes platformës së tij, Truth Social.
