Tanket janë vendosur dhe janë gati për të lëvizur. Gardhe mbrojtëse dhe barriera sigurie janë ngritur. Pllakëza metalike mbrojtëse janë shtruar në rrugët e Uashingtonit.
Mbi 6,000 trupa ushtarake janë në gatishmëri për të marshuar pranë National Mall, në një paradë që do të nderojë 250-vjetorin e themelimit të Ushtrisë së Shteteve të Bashkuara të Amerikës — një festim që përkon me ditëlindjen e 79-të të Presidentit Donald Trump, të shtunën.
Ndërsa përgatitjet janë në fazën përfundimtare, një faktor i paparashikueshëm mbetet moti. Parashikimet sinjalizojnë reshje shiu dhe stuhi, gjë që mund të ndërpresë paradën, raporton AP, transmeton Klankosova.tv.
Zëdhënësja e Shtëpisë së Bardhë, Anna Kelly, deklaroi të enjten se parada do të zhvillohet “në çfarëdo kushte moti”, ndonëse në rast rrufesh, ajo mund të shtyhet përkohësisht.
“Pavarësisht gjithçkaje, një festim historik për nder të ushtarakëve tanë do të mbahet!”, tha Kelly.
Aktivitetet përkujtimore do të zgjasin gjatë gjithë ditës në National Mall, me pjesëmarrjen e sportistëve të NFL-it, gara fizike, ekspozita ushtarake dhe do të kulmojnë me paradën, e cila pritet të kushtojë mes 25 deri në 45 milionë dollarë. Ushtria pret deri në 200,000 pjesëmarrës.
Një zonë e veçantë do të ngrihet pranë Shtëpisë së Bardhë për Presidentin, ku ai do të ndjekë paradën ndërsa formacionet kalojnë para tij.
Çfarë do të përfshijë parada?
Trupat pjesëmarrëse:
6,169 ushtarë, si dhe 128 tanke, automjete të blinduara dhe artileri do të parakalojnë para Presidentit dhe publikut. Gjithashtu, 62 avionë do të fluturojnë mbi qytet.
Parada do të rrëfejë historinë e Ushtrisë Amerikane — duke nisur nga Beteja e Lexingtonit, beteja e parë e Luftës për Pavarësi, e deri në kohët moderne.
Çdo epokë historike do të përfaqësohet nga 150 ushtarë të veshur me uniforma të kohës, të ndjekur nga një grup i madh me uniforma moderne. Planifikimi ka qenë i detajuar: parada do të zgjasë fiks 90 minuta, sipas zëdhënësit të Ushtrisë, Steve Warren.
Tanket dhe avionët
8 minuta e 23 sekonda pas nisjes, do të shfaqet tanku Renault i Luftës së Parë Botërore — një simbol historik i luftës nëpër llogore, pavarësisht përmasave të tij modeste.
13 minuta e 37 sekonda pas fillimit, fillon fluturimi i parë ajror: përfshirë dy bombardues B-25 Mitchell, katër avionë luftarakë P-51 Mustang dhe një avion transportues C-47 Skytrain — ky i fundit i njohur për përdorimin e tij në Ditën e Zbritjes në Normandi, më 6 qershor 1944.
Më tej, parada kalon në periudhën e Luftës së Gjirit, luftën kundër terrorizmit dhe epokën moderne — duke shfaqur tanke M1A2 Abrams, automjete taktike dhe Stryker-at. Do të përfshihen edhe gjashtë sistemet raketore të lëvizshme HIMARS, armë që kanë luajtur rol kyç në mbrojtjen e Ukrainës ndaj agresionit rus.
48 minuta pas nisjes së paradës, një spektakël ajror do të dominojë qiellin me helikopterët UH-60 Black Hawk, AH-64 Apache dhe CH-47 Chinook — duke simbolizuar kapacitetet e ardhshme të ushtrisë.
Kulmi i paradës
Pjesa finale do të përfaqësojë të ardhmen e Ushtrisë: Banda e Akademisë Ushtarake të West Point do të udhëheqë qindra të rinj – përfshirë kadetët nga Texas A&M, rekrutët e rinj që sapo kanë nisur stërvitjen bazë, dhe përfaqësues nga institucionet ushtarake si VMI dhe The Citadel.
Seksioni i fundit do të përfshijë 250 rekrutë të rinj ose ushtarë që janë duke u rizotuar. Kur të arrijnë pranë Presidentit Trump, ata do të kthehen drejt tij, do të ngrejnë dorën e djathtë dhe do të betohen në shërbim.
Parada do të mbyllet me një hedhje spektakolare nga skuadra e parashutistëve “Golden Knights”, të cilët do t’i dorëzojnë Presidentit flamurin amerikan.
Pas paradës, do të ketë një koncert dhe spektakël fishekzjarrësh që do të zgjasë 19 minuta
