Televizioni “Dukagjini” ka ndërprerë për pak sekonda sinjalin si shenjë proteste për miratimin e ligjit të KPM-së që i vë mediat online nën kontrollin e shtetit.
Kjo ndërprerje e sinjalit është bërë para se të niste emisioni “Debat Plus”.
Me 59 vota për, asnjë kundër dhe dy abstenime, në Kuvendin e Kosovës sot është miratuar në lexim të dytë Ligji për KPM-në. Partia në pushtet miratoi Projektligjin me 93 amendamente, i cili parasheh licencimin e mediave online, monitorim e tyre dhe gjoba deri në 40 mijë euro është konsideruar i dëmshëm, pasi rrezikon të cenojë lirinë e shprehjes dhe lirinë e mediave.
Në këtë pikë të rendit të ditës, opozita veçse kishte lëshuar sallën e Kuvendit, pasi kërkesa e tyre sot ishte që ky projektligj dhe dy të tjerë të largoheshin nga rendi i ditës.
Lidhur me miratimin e këtij projektligji pati përnjëherë reagime të shumta. Asociacioni i Gazetarëve të Kosovës vlerëson se miratimi i këtij ligji është goditje ndaj lirisë së medies dhe tentim për disiplinim e kontroll të tyre.
“Votimi i sotëm do të ketë një tjetër efekt negativ në renditjen e vendit në raportet ndërkombëtare të fushës. AGK-ja, bën thirrje për përdorimin e të gjitha mjeteve ligjore dhe kushtetuese për ta kundërshtuar hyrjen në fuqi të ligjit”, thuhet mes tjerash në reagimin e AGK-së.
Se Kosova ka humbur sot një mundësi për të pasur dy Ligje të mira të ndryshuara, atë për Këshillin Prokurorial të Kosovës dhe Ligjin për Komisionin e Pavarur të Mediave, e tha shefi i zyres së BE-së në Kosovë, Tomáš Szunyog.
Sipas shefit të BE-së, Kuvendi i Kosovës dështoi t’i fusë të plota rekomandimet e BE-së dhe organizatave të tjera ndërkombëtare.
