Zyrtari i Aleancës për Ardhmërinë e Kosovës (AAK), Pal Lekaj, ka kritikuar ashpër drejtimin aktual të Partisë Demokristiane, duke theksuar se kjo parti, e trashëguar nga i ndjeri Mark Krasniqi, nga një subjekt me vlera të qarta të djathta është transformuar në një “degë të majtë”.
Lekaj shprehet i bindur se udhëheqja e tanishme nuk ka njohuri mbi konceptet e drejtimeve politike dhe ka dështuar në ruajtjen e traditës dhe prestigjit të partisë. Ai thekson se personat aktualë në krye të partisë nuk kanë qenë pjesë e proceseve të rëndësishme për vendin dhe kjo u evidentua edhe përmes koalicionit me partinë e majtë ekstreme në Kosovë.
Sipas Lekajt, për drejtuesit aktualë rëndësi kanë vetëm interesat e një grupi klanor, duke e çuar një nga partitë më të vjetra shqiptare në Kosovë drejt rënies.
Ai fton strukturat dhe mbështetësit e vlerave të djathta që t’i bashkohen ruajtjes së këtyre vlerave kombëtare për të mirën e vendit, duke paralajmëruar se “kapitullimi i tyre është sot dhe kjo do të vërtetohet më 28 dhjetor”.
Postimi i Lekajt:
“Partia Demokristiane”, e trashëguar nga i ndjeri Mark Krasniqi, nga një parti me vlera të mirëfillta të djathta është kthyer në një “degë të majtë”.
Jam më se i bindur se udhëheqja e kësaj dege lokale as nuk i di e as nuk i kupton konceptet e drejtimeve politike, sepse pikërisht kjo udhëheqje e ka shkatërruar një parti që ishte simbol i vendit në shumë procese të rëndësishme. Në krye të saj erdhën njerëz që nuk ishin pjesë e asnjë procesi të mirë për vendin, dhe këtë e dëshmuan edhe me koalicionin me të majtën ekstreme në Kosovë, duke treguar se për ta kanë rëndësi vetëm interesat e një grupi klanor, që po e çon një nga partitë e para shqiptare në Kosovë drejt fundosjes.
I ftoj të gjitha strukturat dhe mbështetësit e vlerave të djathta që t’u bashkohen këtyre vlerave kombëtare për të mirën e vendit, sepse të gjithë e dimë se ku janë ato vlera kombëtare.
Kapitullimi i tyre është sot dhe kjo do të vërtetohet më 28 dhjetor.
