Kryetari i Sindikatës së Policisë së Kosovës, Imer Zeqiri, ka shpalosur një letër të dorëheqjes së një polici, për shkak të kushteve të dobëta të punës.
Zeqiri në Klan Kosova, ka lexuar letrën e dorëheqjes së një zyrtari policor e bërë vetëm dy ditë më parë.
Letra e dorëheqjes së dorëzuar nga polici, të cilën Zeqiri e lexon, shkruan: “Ju njoftoj se nga data 2.10.2023, jap dorëheqje vullnetare nga puna për arsye personale dhe ekonomike. Kam nënshkruar kontratë me Policinë e Kosovës duke pranuar kushtet e pagesës, ku nga ministri i Punëve të Brendshme, jemi njoftuar nga mediat se do të paguhet edhe pagesa e rrezikshmërisë në mënyrë retroaktive, gjë që nuk ka ndodhur. Ndërkohë jam pajisur me vizë pune. Nuk kam menduar ta lëshojë Kosovën, por paga prej 420 euro nuk më mjafton dhe kam qëndruar në polici duke menduar se do të më paguhet rrezikshmëria. Duke parë që kjo nuk është duke ndodhur, po jap dorëheqje nga Policia e Kosovës. Kërkoj të ma aprovoni kërkesën time për dorëheqje”.
