Deputetja e Kuvendit të Kosovës, Fitore Pacolli, e ka mohuar se e ka ditur që vëllai i saj ka aplikuar për grant në Ministrinë e Bujqësisë.

Ajo shtoi se këtë informatë nuk e ka ditur as ministri Peci dhe se vetëm pasi vëllai i saj e ka fituar grantin, e ka njotuar atë.

“Unë mendoj që sikur ta thërras edhe forenzikën e CIA-s për ta hulumtuar komplet rastin, s’gjejnë asnjë element të përfshirjes sime në këto lëndë, sepse këta nisen prej vetes, kur më sulmojnë mua, nisen prej vetes sepse këta kanë punuar në këtë formë. Unë nuk punoj në këtë formë. Unë nuk ndërhyj në procese dhe vendime që marrin qoftë ministritë apo të tjerët. Unë kam punuar edhe në Komunën e Prishtinës, kapm pasur pozitë ekzekutive, mirëpo asnjëherë në jetën time në punët publike që i kam bërë, nuk kam ndërhyrë për askënd. Sepse unë e çmoj meritokracinë dhe mendoj që ne duhet të punojmë fuqishëm dhe pa u ndalur për të krijuar sistem ku secili qytetar i Republikës së Kosovës, pavarësisht se a është vëllai apo motra e dikujt, apo i takon një partie politike, të mos ndëshkohet ose vlerësohet në bazë të preferencave, por të vlerësohet në bazë të meritokracisë”, deklaroi Pacolli.

Tutje ajo shtoi se vëllai i saj është rritur në një kulturë tjetër, meqenëse ka jetuar shumë vite në Londër, dhe se atje vlerësohesh drejt dhe në bazë të meritës.

“Ai ka aplikuar për grant në atë kuptimin që ‘unë jam fermer, me takon të aplikoj në përputhje me thirrjet e ministrisë’, dhe me dëshirën e madhe që e ka pasur që të kthehet në Kosovë të investojë dhe ka menduar që është e drejtë e tij që të aplikojë dhe të vlerësohet korrekt”, sqaroi deputetja Pacolli.

E njëjta po ashtu ka bërë të ditur se ka ngritur padi ndaj një numri të madh të njerëzve, përfshirë kryetarin e LDK-së, Lumir Abdixhikut, dhe një numri të deputetëve, teksa tregoi se këto padi i ka bërë për dy raste, për të cilat, thotë ajo është akuzuar se ka interferuar që t’i ndahet një grant vëllait të saj kur ka aplikuar për subvencione, si dhe një vendim për të cilin e mori motra e saj që punon në Gjykatën Komerciale.

“Kam ushtruar padi ndaj kryetarit të LDK-së, ndaj disa deputetëve të LDK-së, edhe ndaj disa gazetarëve. Poashtu, jam në proces të ushtrimit të padisë ndaj diku 15 personave që janë fytyra publike edhe personazhe të mediave të ndryshme këtu në Kosovë, të cilët më kanë sulmuar për rastin e fundit”.

“Pra për të dyja këto, për rastin e parë i jam drejtuar gjykatës, dhe për këtë rastin e fundi do t’i drejtohem gjykatës, sepse është shumë e padrejtë që të sulmohem dhe të etiketohem pa ndonjë arsye”, ka thënë Pacolli në KlanKosova