Në dritën e ngërçit institucional në të cilin gjendet Kosova në pamundësi të konstituumit të legjislaturës së nëntë, Presidentja e Kosovës, Vjosa Osmani, nisi sot një cikël të ri takimesh konsultative me liderët politikë të vendit. Gjatë takimeve, siç bëhet e ditur nga Presidenca, Osmani ka kërkuar që brenda afatit 30-ditor të përcaktuar nga Gjykata Kushtetuese të arrihet një pajtim për konstituimin e Kuvendit.
“Presidentja Osmani u ka bërë thirrje liderëve që në frymën e bashkëpunimit dhe mirëbesimit, si dhe në dobi të interesit qytetar dhe shtetëror, sa më shpejt, por gjithsesi brenda afatit 30- ditor të përcaktuar nga Gjykata Kushtetuese, të arrihet një pajtim rreth rrugës përpara për konstituimin e Kuvendit.” – thuhet në njoftim.
Osmani citohet të ketë paralajmëruar moskonstituimi në kohë i institucioneve të reja rrezikon vlerat demokratike dhe besimin e qytetarëve në institucionet publike.
“Presidentja Osmani konsideron se moskonstituimi i institucioneve të reja të dala nga vullneti i qytetarëve i shprehur më 9 shkurt të këtij viti dëmton vlerat demokratike si dhe interesat e shtetit tonë, pengon një sërë përftimesh shtetërore që janë në interes të qytetarëve dhe zvogëlon besimin qytetar në institucione.” – njoftoi tutje Presidenca.
Osmani thuhet se ka paralajmëruar takime konsultative edhe me partitë e tjera të përfaqësuara në Kuvend.
“Presidentja Osmani do të vazhdojë me takime konsultative me partitë e tjera të përfaqësuara në Kuvend edhe përgjatë ditëve në vijim, në rolin e saj si garantuese e funksionimit kushtetues dhe përfaqësuese e unitetit të popullit në Republikën e Kosovës.”
Çka deklaruan liderët e partive politike?
Deputeti i VV-së, Albin Kurti me të dalur nga takimi me Presidenten e vendit, Vjosa Osmani, si rrallëherë është ndalur para gazetarëve, duke thënë se kanë përmbendur të gjitha elementet përbërëse me Presidenten. Madje ai tha se ‘për progres jemi të interesuar të gjithë’
“E diskutuam idenë e kompromisit, që ta realizojmë këtë gjë, që pastaj të dalim te formimi i qeverisë së re, që i përgjigjet Kuvendit, diskutuam gjërë e gjatë, i përmendëm të gjitha elementet përbërëse. Zonja Presidente do të ketë takime edhe me liderët e tjerë të partive politike dhe të shohim se a kemi bërë përparim apo jo. Unë besoj se duhet t’ia japim shansin takimeve të reja, takimeve të tjera që ta shohim nëse e kemi bërë progresin për të cilin jemi të interesuar të gjithë.” – tha Kryetari i Vetëvendosjes, Albin Kurti.
Ndërkohë, Kryetari i PDK-së, Memli Krasniqi, nuk e la pa folur edhe për mënyrën se si Vetëvendosja po e interpreton Aktgjykimin e Gjykatës Kushtetuese, për bllokadën në Kuvend.
“Sa i përket Gjykatës dhe Kushtetutës e aktgjykimeve, nëse ka një parti politike dhe lider që s’duhet me u marrë me interpretime, është Albin Kurti dhe Vetëvendosje, sepse sa herë i kemi çu në Kushtetuese, ne i kemi fitu lëndët e ata i kanë hupë. Në të kaluarën s’kanë ditë për tema më të rëndësishme me bo interpretime”, ka deklaruar Krasniqi.
Nga ana tjetër, kreu i LDK-së, Lumir Abdixhiku, mirëprito gatishmërinë e presidentes Osmani për të ndihmuar në tejkalimin e ngërçit politik.
Abdixhiku ka thënë se VV-ja e ka kapur në mënyrë arbitrare Kuvendin e Kosovës.
“I pari ka kapur institucionin kushtetues nëpërmjet më të moshuarit. Më i moshuari po refuzon të implemetojë aktgjykimin e Gjykatës Kushtetuese, në mënyrë krejt arbitrare”, ka thënë Abdxhiku.
Ai e ka kritikuar edhe kryetarin e VV-së, Abin Kurti, për situatën politike. I pari i LDK-së ka thënë se Kurti nuk po e kupton përgjegjësinë e tij.
“Deputeti Kuti refuzon të kuptoi përgjegjësinë e vetë, pragmatizmi politik. Nuk është tragjedi me bo kompromis, është vlerë normale demokratike. Ka parti që po ia jepen atë kompromis”, ka thënë Abdixhiku.
Ndërsa kryetari i Aleancës për Ardhmërinë e Kosovës, Ramush Haradinaj, tha se partia që ai drejton kërkon kthimin e votimit të hapur për kryetarin e Kuvendit.
Ai shtoi se nga kjo parti do të votojnë “për” nëse ka kandidat konsensual.
“Insistimi i kryesuesit që me e kthy çështjen e komisionit të fshehtë s’i ka marrë 2/3 kur ka kërku të ndërrohet. Nuk e di si do të dalim nga kjo”, tha ai.
“Ne qëndrimet i kemi dhanë me kujdes që të ndihmojnë gjendjen. S’është që s’kemi dhënë ndihmë. Kemi kërkuar të kthehet praktika e hapur e votimit për të votuar. Për atë që s’kemi votë do të votojmë kundër, për ata që kemi votë, për ndonjë kandidat konsensual, do të votojmë për”, shtoi kreu u AAK-së.
