Në Ditën Ndërkombëtare të Personave të Zhdukur me Dhunë, Presidentja e Kosovës, Vjosa Osmani, ka theksuar rëndësinë e drejtësisë për familjet që po presin për më shumë se dy dekada për të zbuluar fatin e të dashurve të tyre të zhdukur.
Ajo ka përkujtuar se 1584 qytetarë të Kosovës ende janë të zhdukur, dhe se pas çdo numri fshihet një jetë e ndërprerë, një familje që vazhdon të jetojë me dhimbjen e humbjes.
Osmani ka theksuar se varrezat masive janë dëshmi e krimeve të luftës dhe të regjimit serb, dhe se çdo ditë që kalon pa zbardhjen e fatit të të zhdukurve, paqja në rajon mbetet e paplotë.
Ajo ka bërë thirrje për rritjen e presionit ndërkombëtar ndaj Serbisë, duke theksuar se vetëm zbardhja e fatit të të zhdukurve dhe realizimi i drejtësisë mund t’i japin familjeve të prekur nga ky krim qetësinë që meritojnë.
