Pas katër muajsh oficerët e rinj të FSK-së kanë përfunduar me sukses ushtrimin final fushor të Kursit Bazik për Oficerë.

Këtë e ka bërë të ditur ministri i Mbrojtjes, Armend Mehaj, përmes një postimi në Facebook.

“Gjenerata e parë e Kursit Bazik për Oficerë, ka përfunduar ushtrimin fushor të fundit, pas 4 muajsh sfidues akademik në kursin përkatës, i cili u realizua në kuadër të Shkollës sonë të Oficerëve. Kursi Bazik për Oficerë është i përbërë nga tri faza, ku kursantët u testuan në pjesën teorike dhe praktike në modulet e Operacioneve I dhe Operacioneve II”, ka shkruar Mehaj në Facebook.

Mehaj tha se përkundër motit të ftohtë dhe sfidave të ndryshme në terren, kandidatët treguan përkushtim maksimal dhe rezultate të larta në ushtrim.

“Ju lumtë dhe vazhdojmë me suksese të reja”, ka shtuar Mehaj.