199 pjesëtarë të strukturave ilegale të së ashtuquajturës “Mbrojtja civile” nga komuniteti serb morën 962,646 euro paga pa shkuar ndonjëherë në punë. Të njëjtit ishin angazhuar me Marrëveshjen e Brukselit.
Kështu bën të ditur raporti vjetor i Auditimit për buxhetin e vitit të kaluar.
“Gjatë vitit 2021, Qeveria kishte realizuar pagesa në vlerë prej 962,646€ për 199 punonjës (të komunitetit serb të angazhuar me Marrëveshjen e Brukselit) të cilët nuk evidentohen për vijueshmëri në punë dhe nuk zhvillojnë aktivitete në kuadër të Ministrive përkatëse”, thuhet në raportin e auditimit.
Më 2015-ën, Qeveria e Kosovës ishte marrë vendim për shpërbërjen e së ashtuquajturës “Mbrojtja Civile”, e cila ka funksionuar në katër komunat veriore të Kosovës.
Mirëpo, siç njofton raporti “Ministritë përkatëse i kanë vendos në listen e pagave këtë kategori të punonjësve para krijimit të kushteve/hapësirave fizike për punë, sistemim, angazhim dhe monitorim të tyre, që i bënë këto pagesa të parregullta”.
Ministria e Mjedisit, Planifikimit Hapësinor dhe Infrastrukturës kishte numrin më të madh të stafit të paguar nga e ashtuquajtura “Mbrojtja Civile”.
