Nën patronatin e presidentes së Kosovës, në qendrën e njësive speciale të Policisë së Kosovës në Mitrovicë “Enver Zymberi”, është organizuar sot “Dita e Falenderimeve”, apo siç njihet ndryshe “Darka e Lamës”.

Megjithatë, siç mëson lajmi.net, këtë organizim që sivjet si asnjëherë më parë është mbajtur në kampin policor, e kanë bojkotuar pjesëtarët e Njësisë Speciale Intervenuese, e njohur ndryshe edhe si FIT.

Deri te ky vendim mësohet se ka ardhur si shkak i pakënaqësisë së pjesëtarëve për shkak të mospagesës së rrezikshmërisë dhe mosrealizimit të kërkesave të tjera të këtij njësiti nga shteti.

Lajmi.net ka kontaktuar edhe me kryetarin e Sindikatës së Policisë, Imer Zeqirin, por i njëjti ka thënë se nuk ka marrë pjesë në “Darkën e Lamës”, ndaj dhe nuk mund ta konfirmoj një informacion të tillë.

“Unë vetëm e di që është organizu kjo “Darka e Lamës”. Për veti nuk kam marrë pjesë se kam qenë në Gjakovë. Kurdo që të kem ndonjë informacion për këtë që i thoni, do t’ju kontaktoj”, ka thënë Zeqiri përmes telefonit.