Eshtrat e një ushtari armik të dekompozuar, ende me uniformën e tij të gjelbër dhe çizmet e zeza, qëndruan për muaj të tërë në periferi të një fshati në verilindje të Ukrainës, por një njësi speciale ukrainase i mblodhi ato.
Kufomat mund të mbeten të pazbuluara nën rrënoja ose në zonat rurale, ndërsa luftimet janë intensifikuar dhe zyrtarët ukrainas thonë se rusët shpesh nuk i mbledhin trupat e ushtarëve të tyre të rënë.
Mbledhja e trupave, për arsye të mbrojtjes së shëndetit publik dhe për shkëmbime të mundshme në të ardhmen me forcat ruse, është një detyrë e përbashkët e autoriteteve dhe vullnetarëve ukrainas.
Në fshatin Synykha në rajonin e Kharkivit, mbetjet skeletore të ushtarit të vdekur ndodheshin në një fushë, ku u zbuluan së fundmi nga një 10 vjeçar që po kujdesej për bagëtinë.
Pasi familja e djalit raportoi tek zyrtarët gjetjen e mbetjeve, një ekip vullnetarësh ukrainas mbërriti në fshat për të marrë kufomën në prani të gazetarëve.
Një nga gazetarët e pyeti djalin 10 vjeçar nëse u frikësua kur gjeti trupin.
“Jo”, tha ai. “Pse do të duhej të ishim të frikësuar?”
Dokumentet e dëmtuara nga uji, të gjetura në uniformën e ushtarit të vdekur, ishin nga Republika Popullore e Luhanskut, në Ukrainën lindore, e mbështetur nga Moska. Ato i përkisnin një burri 48-vjeçar.
Nuk u bë e mundur menjëherë të konfirmohej identiteti i kufomës, i cili do t’i nënshtrohet ekzaminimit nga autoritetet ukrainase. Yuryst është anëtar i një njësie vullnetare të quajtur “J9”, e cila merret me kërkimin e trupave të ushtarëve të vrarë të armikut, që më pas mund të kthehen në Rusi si pjesë e një shkëmbimi me Moskën.
Trupi, tha vullnetari Yuryst, është lënë i shtrirë në tokë që nga shtatori i vitit 2022, kur forcat ukrainase zmbrapsën trupat ruse nga rajoni i Kharkivit.
Ai mund të ketë hedhur veten në erë ose mund të ketë shkelur eksplozivët.
Me doreza, por pa maska, Yuryst dhe një anëtar tjetër i njësisë së tij morën mbetjet dhe i vendosën në dy thasë përpara se t’i çonin në qytetin e Kharkivit për t’i ruajtur ato në vagon frigorifer të një treni.
Në kuadër të procesit të identifikimit, viktimës do t’i merren mostrat e ADN-së.
Zoti Yuryst gjithashtu vuri në dukje se të dhënat dentare të burrit do të jenë të dobishme, duke shtuar se: “Kjo është hera e parë që kam parë dhëmbë kaq të përsosur.”
Vullnetari Yuryst tha se ai ka zbuluar më shumë se 400 trupa në qytetin e Kharkivit dhe zonën përreth tij.
Ai thotë se puna e tij është e rëndësishme. Ai dhe anëtarët tjerë të grupit po krijojnë një listë të kufomave për shkëmbimet e ardhshme me Moskën dhe po mbledhin prova për Gjykatën Penale Ndërkombëtare. Mbledhja e trupave të personave të vdekur ndihmon edhe në uljen e rrezikut të përhapjes së sëmundjeve.
“Këta janë tre faktorët që e bëjnë punën time të rëndësishme”, thotë ai.
