Muharrem Ince, njëri nga katër kandidatët në zgjedhjet presidenciale të Turqisë të 14 majit, ka njoftuar se po tërhiqet nga kandidatura.

Ince është kreu i partisë Mermleket (Atdheu) dhe sondazhet i dhanë atij midis dy dhe katër për qind të votave në zgjedhje, transmeton Demokracia.com.

Disa anëtarë të partisë së tij kanë dhënë dorëheqjen ditët e fundit, të shqetësuar se kandidatura e tij mund të pengojë Kemal Kilicdaroglu, kandidatin kryesor të opozitës, të mposht Presidentin Rexhep Tajip Erdogan, i cili ka qenë në pushtet për 20 vjet.

Ince e arsyetoi vendimin e tij, duke deklaruar se aleanca opozitare e udhëhequr nga Kilicdaroglu do t’ia hidhte të gjithë fajin nëse ai nuk mundte Erdoganin.

Në verën e vitit 2018, Muharem Ince ishte një kandidat i pasuksesshëm i Partisë Popullore Republikane (CHP-socialdemokratët) në zgjedhjet presidenciale – ai u mund nga Erdogan në raundin e parë.

Ince krijoi partinë e tij laike nacionaliste në maj 2021.

Kemal Kilicdaroglu, kreu i CHP-së dhe kandidati i një aleance që bashkon gjashtë parti opozitare, është në një pozicion të mirë krahasuar me Erdoganin, i cili po përballet me një opozitë të bashkuar për herë të parë në njëzet vjet.