Federata e Futbollit të Kosovës (FFK) ka njoftuar se ka nisur kampi katërditor me futbollistët që shihen si kandidatë potencial për t’u bërë pjesë e Kombëtares së Kosovës.
Përzgjedhësi Franco Foda ka ftuar futbollistë nga klubet vendore dhe evropiane për t’i njoftuar për strategjinë dhe filozofinë e lojës, në mënyrë që kur të ftohen të jenë të gatshëm.
Edhe pse u ftua, në stërvitje mungoi ylli i KF Malishevës Drilon Hazrollaj, për të cilin FFK vetëm shkroi se “nuk iu bashkua ekipi”.
Ndër emrat e rinj në këtë kamp ishte edhe ish kapiteni i Suedisë U19 Albin Gashi, i cili deklaroi se Kosova është gjaku i tij dhe ndihet mirë që do të përfaqësojë “Dardanët”.
“Është kënaqësi të luash për Kosovën. Është gjaku im këtu, babai im ka lindur këtu, familja ime është këtu dhe është ndjenjë e mirë”.
Ndërkohë, të lumtur që janë pjesë e këtij kampi u shprehën edhe dyshja Etnik Brruti e portieri Erion Avdija.
“Normalisht është privilegj i madh për mua dhe secilin lojtar ta përfaqësojë Kosovën. Çdo njeri po e jep maksimumin në stërvitje. S’ka problem që është vetëm kamp stërvitor, pasi secili përgatitet të jetë i gatshëm për ndeshje kualifikuese. Për momentin jam kapiten te Kombëtarja U21 dhe besoj që në një të ardhme shumë të shpejtë do të arrij edhe në Kombëtaren A të Kosovës”, tha Brruti.
“Shumë mirë po më duket këtu me trajnerët e Kombëtares A dhe me lojtarët, shumë prej të cilëve i njoh dhe që kanë luajtur për ekipet e grupmpshave të Kosovës. Stërvitja e parë kaloi shumë mirë, por i kemi edhe tri ditë. Kombëtarja A? Ky ka qenë gjithmonë qëllimi im, por kam kohë ende, jam i ri. Kombëtarja ka portierë të mirë, por mua më mbetet të punoj dhe të paraqitem mirë me klubin. Sigurisht se qëllimi i të gjithëve këtu është për të luajtur me Kombëtaren A”, shtoi Avdija.
Në këtë stërvitje mungoi përzgjedhësi Franco Foda që ishte i sëmurë, por pritet që ta mbikëyrë stërvitjen të hënën me fillim nga ora 11:00.
