Ngritet aktakuzë ndaj të pandehurit për grisjen e Kuranit në Prizren
Prishtinë – Prokuroria Speciale e Republikës së Kosovës (PSRK) ka dorëzuar në Departamentin Special të Gjykatës Themelore në Prishtinë aktakuzë kundër të pandehurit I.P., të cilin e ngarkon për nxitje të përçarjes dhe mosdurimit, për shkak të grisjes së librit të shenjtë të fesë islame- Kuranit, më 3 mars 2025 në Prizren.
PSRK-ja ka ngritur aktakuzën me propozim për shqiptimin e masës së trajtimit të detyrueshëm psikiatrik në liri ndaj I.P.
“Sipas aktakuzës, i pandehuri, më 03.03.2025, në afërsi të Teqes “Saraçhane” në Prizren, ka nxitur dhe përhapur publikisht urrejtje dhe mosdurim midis grupeve fetare. Hetimet kanë rezultuar se I.P. e ka grisur dhe e ka shpërndarë në tokë librin e shenjtë të myslimanëve, Kuranin, duke shkaktuar mllef të madh te komuniteti islam dhe duke cenuar bashkëjetesën ndërmjet grupeve me ideologji të ndryshme fetare”, thuhet në njoftim.
Me këtë, I.P., ngarkohet se ka kryer veprën penale “Nxitja e përçarjes dhe mosdurimit”, sipas nenit 141, paragrafi 1 të Kodit Penal.
“Prokurori i çështjes, me rastin e ngritjes së aktakuzës, i ka propozuar Gjykatës që i pandehuri të shpallet fajtor dhe t’i shqiptohet masa e trajtimit të detyrueshëm psikiatrik në liri, meqenëse aftësia e tij, në kohën e kryerjes së veprës penale, për të gjykuar dhe kontrolluar veprimet e veta ka qenë e zvogëluar në shkallë esenciale”, njofton PSRK-ja.
Ndryshe, “Betimi për Drejtësi” më 15 maj raportoi se të pandehurit i është vazhduar masa e paraburgimit edhe për dy muaj.
