Policia e Kosovës përmes një komunikate kanë njoftuar se edhe pas më shumë se dy viteve prej kur ishte raportuar Nezir Osmani, ende figuron si person i humbur.
Sipas Policisë së Kosovës, edhe pse tashmë ka filluar plani për kërkim, e janë marrë të gjitha masat relevante nga secili insituticion që mund të kishte ndihmuar në lidhje me rastin, prapë se prapë personi nuk është gjetur.
Andaj nga Policia e Kosovës, po kërkohet ndihma e qytetarëve, që në rast se posedojnë çfarëdo informacioni relevant për personin Nezir Osmani, të lajmërojnë numrin e telefonit 192. Pra atë të Policisë së Kosovës.
Komunikata e plotë:
Me datë 04.05.2021, në polici është raportuar për një person të zhdukur
Bëhet fjalë për personin, Nezir Osmani i lindur në vitin 1963, banues në lagjen Kodra e trimave.
Që nga dita e raportimit deri më tani, njësitet policore të hetimeve, në koordinim me prokurorinë përkatëse dhe në bashkëpunim të ngushtë me familjarët, kanë ndërmarrë një varg veprimesh si :
-intervistime të personave që mund të ndihmojnë në gjetjen e vendndodhjes së personit,
-kontrollimi i hyrje- daljeve, në të gjitha pikat kufitare,
-kërkime në zona që personi kishte frekuentuar zakonisht (ambiente të mbyllura dhe të hapura),
-analizimi dhe hetimi i çdo lloj informacioni që lidhet me personin etj.
Po ashtu me datën 06.05.2023 ka filluar plani për kërkim ku kanë marrë pjesë gjitha organet e specializuara për kërkim shpëtim nga Policia e Kosovës , FSK si dhe Qendra Emergjente e Komunës së Prishtinës.
Edhe pse veprimet dhe kërkimet policore janë duke vazhduar, pas marrjes së autorizimit nga ana e prokurorit të shtetit, nga ana juaj kërkojmë kontributin tuaj qytetar.
Të gjithë ata që kanë çfarëdo lloj informacioni, që ndërlidhet me të, t’ia kalojnë ato policisë përmes numrit 192.
