Kryeministri izraelit Benjamin Netanyahu ka deklaruar se nuk e përjashton mundësinë e eliminimit të liderit suprem të Iranit, Ayatollah Ali Khamenei, duke theksuar se një veprim i tillë nuk do ta përshkallëzonte konfliktin mes dy vendeve, por përkundrazi, do të ndalonte atë.
Në një intervistë për ABC News, Netanyahu u shpreh se Khamenei është “një Hitler i ri”, dhe se pas një periudhe pesëdhjetëvjeçare të terrorizmit dhe kërcënimeve iraniane ndaj Izraelit dhe aleatëve të tij, koha ka ardhur që ky cikël të përfundojë.
“Mos më pyesni a do ta bëjmë këtë apo jo. Por nëse do ta bënim, nuk do të përshkallëzonim luftën – do ta përfundonim atë. Ky është personi që e drejton gjithçka: programin bërthamor, Gardën Revolucionare Islamike, financimin e Hezbollahut, Hamasit dhe të gjitha grupeve tjera terroriste”, tha Netanyahu.
Ndërkohë, burime amerikane raportojnë se ish-presidenti Donald Trump, kishte refuzuar një plan për eliminimin e liderit suprem iranian, me arsyetimin se një akt i tillë do të kishte pasoja të paparashikueshme për stabilitetin global.
SHBA ka deklaruar se nuk është e përfshirë në operacionet e fundit të Izraelit dhe ka theksuar rëndësinë e përmbajtjes.
