Kryeministri izraelit, Benjamin Netanyahu, deklaroi të enjten se synimi i sulmeve të Izraelit ndaj Iranit nuk është rrëzimi i regjimit në Teheran, por nuk përjashtoi mundësinë që një zhvillim i tillë të ndodhë si pasojë e përshkallëzimit të konfliktit, shkruan Gazeta Sinjali.
“Çështja e ndryshimit të regjimit ose rënia e këtij regjimi është para së gjithash një çështje që i përket popullit iranian,” tha Netanyahu në një intervistë për televizionin publik izraelit Kan.
“Kjo nuk është një objektiv i deklaruar apo formal i Izraelit, por mund të jetë një rezultat.”
Deklarata vjen në një kohë kur tensionet ndërmjet Izraelit dhe Iranit janë në kulm, dhe Shtetet e Bashkuara po shqyrtojnë përfshirjen ushtarake në konflikt. Presidenti amerikan, Donald Trump, pritet të marrë një vendim për këtë çështje brenda dy javësh.
Netanyahu nënvizoi se Izraeli është i gatshëm të veprojë i vetëm për të shkatërruar objektet bërthamore të Iranit, përfshirë edhe uzinën e mbrojtur të Fordow-it pranë qytetit Qom. “Ne kemi fuqinë për të eliminuar të gjitha objektet e tyre bërthamore,” tha ai, duke shtuar se mbështetja e SHBA-së është e mirëpritur, por jo vendimtare.
Analistët ushtarakë paralajmërojnë se një sulm i suksesshëm ndaj Fordow-it mund të kërkojë përdorimin e bombave të specializuara amerikane që depërtojnë në bunkerë, por Netanyahu sinjalizoi se Izraeli është i gatshëm të veprojë i vetëm nëse është e nevojshme për sigurinë e tij kombëtare.
