Liverpooli vazhdon të qëndrojë i fokusuar në përforcimin e sulmit dhe Alexander Isak nga Newcastle United mbetet objektivi kryesor i klubit.
Sipas gazetarit të njohur Fabrizio Romano, “Të Kuqtë” janë të gatshëm të veprojnë menjëherë nëse Newcastle hap mundësinë për negociata.
Romano thekson se Liverpooli nuk po ndjek aktualisht dy lojtarë paralelisht, prioriteti është qartë Isaku. Lëvizja do të ndodhë vetëm nëse Newcastle jep dritën jeshile, gjë që mund të ndikohet nga faktorë si zëvendësimi potencial i lojtarit, presioni i tij për largim ose vendimi i bordit drejtues.
“Marrëveshja për Isakun është ende aktive. Nëse Newcastle vendos ta shesë në ditët ose javët në vijim, Liverpooli do ta blejë atë, pa dyshim. Ai mbetet prioriteti ynë”, tha Romano.
Megjithatë, në rast se transferimi i sulmuesit suedez dështon, Liverpooli është i përgatitur të ndryshojë drejtim dhe të fokusohet te një lojtar krahu, me emrin e Bradley Barcolës të PSG-së në krye të listës së dëshirave.
22-vjeçari francez shihet si një alternativë “e ëndrrave” nga stafi i rekrutimit të Liverpoolit. Por deri më tani, nuk ka pasur as kontakte me kampin e lojtarit, as negociata me PSG-në. Në këtë fazë, një ofertë zyrtare nuk është në përgatitje.
Nga ana e Paris Saint-Germain, qëndrimi është i prerë: Barcola nuk është në shitje. Presidenti Nasser Al-Khelaifi dhe trajneri Luis Enrique janë të vendosur ta mbajnë lojtarin në skuadër, madje klubi është duke përgatitur edhe një rinovim të rëndësishëm të kontratës së tij.
E vetmja mundësi që një transferim drejt Liverpoolit të bëhej realitet, sipas Romanos, do të ishte nëse vetë Barcola kërkon largimin, diçka që ai nuk e ka bërë. Pa një sinjal të tillë nga lojtari, një kalim në “Anfield” duket i pamundur për momentin.
