Albini i botës së opozitarizmit s’u rrinte duarkryq mauneve me mallra serbe që futeshin në Kosovë.
Në realitetin e ri, ku Albin Kurti prej më shumë se katër vitesh mban karrigen e kreut të qeverisë, vëzhgon me indiferencë importin nga Serbia që kapërcen shifra marramendëse — plot 51.7 milionë euro. *Spoiler alert: Ky është vetëm tremujori i parë i vitit 2025.
Për ta vendosur në një kontekst më të gjerë: gjatë së njëjtës periudhë të vitit paraprak, importet nga Serbia ishin 26 milionë euro më të ulëta. Shifrat dëshmojnë një rikthim të bujshëm të tregtisë me Serbinë, pas një reduktimi të përkohshëm.
Krejt kjo erdhi si pasojë e dorëzimit të Kurtit përballë masës kufizuese ndaj mallrave serbe, vendim i marrë në tetor 2024.
Nga ana tjetër, vlera e produkteve të eksportuara në Serbi ishte vetëm 10.6 milionë euro, rreth 40 milionë euro më pak se vlera e importit.
Për shembull, duke qenë një temë e ndjeshme aktualisht, vetëm në tre muajt e parë të vitit, Kosova importoi energji elektrike nga Serbia në vlerë prej 2 milionë eurosh.
Në krahasim me vitin 2024, rritja e importeve nga Serbia është më shumë se eksponenciale.
Ironikisht, Albin Kurti – ish-kritiku më i zëshëm i tregtisë me Serbinë – tani, nga karriga e kryeministrit, ka kohë që vëshgon hovin e paprecedent të importeve nga shteti që ende s’ e njeh pavarësinë e Kosovës.
“Marrëdhënia e re e gjithsesi shumë e vjetër që po na imponohet, “Tregtia e Lirë” midis nesh dhe Serbisë, vendit që nuk na njeh as të drejtën për të ekzistuar, është e dëmshme dhe e gabuar.” – thoshte Vetëvendosje në vitin 2011, kur në magjistralen Prishtinë-Besianë ndërmerrte aksione kundër maunave me mallra serbe.
Braktisja e qëndrimeve do të ishte më e pranueshme po të mos përfshinte edhe heqjen dorë prej një nga premtimeve kryesore të dhëna në fillim të mandatit – mbështetjen për bizneset vendore.
Të dhënat e Agjencisë së Statistikave të Kosovës mbi tregtinë e jashtme (2021-2024) e përgënjeshtrojnë plotësisht narrativën e suksesit ekonomik të shpallur nga Kurti, sipas të cilit Kosova po kalonte në një epokë të re eksportesh nën udhëheqjen e tij.
Deficiti tregtar kumulativ i Kosovës në katër vitet e fundit arrin 19 miliardë euro. Jo thjesht një statistikë, por një përgënjeshtrim brutal i suksesit të shumëtrumbetuar nga kreu i qeverisë.
Bilanci tregtar, që tregon diferencën mes vlerës së produkteve të eksportuara dhe atyre të importuara, pasqyron një trend të frikshëm: me eksportet që ndonëse paten një rritje impresive në vitin 2022, mbeten të zbehta në vitet pasuese. Importet në anën tjetër, u rriten eksponencialisht.
