Në secilën pllakë të mermerit është i gravuar emri i dëshmorit, por asnjëri nuk është i varrosur në të.
Kur do të vijë dita që familjarët të vendosin lule mbi varret me trupa nuk dihet.
Varrezat janë të hapura pa trupat e dëshmorëve. Dëshmorët e Istogut janë të varrosur në një pjesë tjetër të fshatit Vrellë. Arsyeja se pse ata nuk po sillet për t’u varrosur këtë është se disa ish-ushtarë të Ushtrisë Çlirimtare të Kosovës, pretendojnë se dhjetëra emra të civilëve janë futur për emër të dëshmorëve.
Ali Sefaj është më i zëshmi, bashkëluftëtar i dëshmorëve, i plagosur.
“Fatkeqësisht është fry numri i dëshmorëve nga 51 janë shtuar edhe 13 sosh. Ne si bashkëluftëtar dhe familje të dëshmorëve e kemi kundërshtu rivarrosjen e tyre”, ka thënë Sefaj.
Sefaj thotë se nuk duan ta nënvlerësojnë sakrificën e asnjë martiri, por nuk e kanë ndër mend të zmbrapsen nga kundërshtimi për të vërtetën.
“Këta njerëz kanë zgjedhur të sakrifikojnë të vdesin me vetëdije dhe nuk mund të krahasohet me dikë që e ka zënë vdekja duke kërku shpëtimin, ose duke kërku ikjen”, a shtuar Sefaj.
Për dyshimet për falsifikim është dorëzuar kallëzim penal në Polici, ndërsa është vënë në lëvizje edhe Prokuroria.
“Më pas është njoftuar Prokurori i krimeve të rënda, i cili e ka autorizuar Policinë e Kosovës të merren disa veprime hetimore. Kemi pranuar disa raporte nga Policia e Kosovës ndërsa janë edhe atorizime shtesë për Policinë e Kosovës nga Prokurori i Shtetit, dhe aktualisht jemi në fund të procesi hetimor, ku pasi që të përfundojnë hetimet do të dalim me epilog lidhur me këtë çështje që jemi duke e hetuar”, ka thënë zëdhënësi i Prokurorisë Themelore në Pejë, Shkodar Nikçi.
Për shkak të këtij mos-pajtimit në shënimin e ditës së dëshmorëve në Istog janë parë forca të shtuara të Policisë së Kosovës.
Vendosja e lapidarit të dëshmorëve në Istog bashkë me 13 emrave që pretendohet se janë shtuar kishte nxitur reagim nga veteranë dhe familjarë të dëshmorëve. Një pjesë e emrave publik ishin mbuluar me ngjyrë të kuqe si shenjë kundërshtimi.
