Për Kupën Giresse, legjendat e sportit nga Variétés Club dhuruan spektakël në mbështetje të UNICEF-it. Fabien Barthez, Richard Gasquet, Claude Puel… shumë personalitete të njohura udhëtuan drejt Balma Sporting Club për të marrë pjesë në këtë aktivitet.
Organizuar këtë fundjavë nga Balma Sporting Club (BSC) në mbështetje të UNICEF-it, Kupa Giresse mblodhi mbi 500 të rinj përgjatë brigjeve të lumit Hers.
Që nga krijimi i saj në vitin 2021, futbollisti legjendar Alain Giresse ka qenë mbështetësi kryesor i këtij eventi dhe ftoi miqtë e tij nga Variétés Club de France për të zhvilluar një ndeshje gala kundër një skuadre lokale. Rezultati përfundimtar: 6 me 3 për ekipin e Variétés.
Përpara një audience të mbushur plot, ndeshja bashkoi disa nga legjendat e futbollit dhe sportit, si Marius Trésor, Fabien Barthez, Sidney Govou, Souleymane Diaëara, Richard Gasquet, Dominique Rocheteau, Claude Puel, Jean-François Domergue, Alain Giresse dhe të tjerë.
“Variétés Club de France është një familje e madhe,” thekson Jacques Vendroux, themeluesi i këtij ekipi ikonik. Gazetari sportiv, i cili hyn në vitin e tij të 55-të si drejtor i përgjithshëm i Variétés, shton: “Ne luajmë vetëm për kauza bamirësie.”
“Variétés zhvillon 40 ndeshje në vit. Kur një anëtar i klubit na kërkon të luajmë një ndeshje, e bëjmë dhe angazhohemi. Në dhomat e zhveshjes ka yje të mëdhenj, yje mesatarë, yje të vegjël dhe njerëz të panjohur. Është një aventurë njerëzore e jashtëzakonshme!”
Sipas Claude Puel, “të nxjerrësh në pah një organizatë si UNICEF është diçka e jashtëzakonshme. Të jemi në dispozicion për këtë është përparësi.”
Një objektiv që ndahet edhe nga Alain Giresse: “Kjo na lejon të komunikojmë vlerat e sportit përmes asaj që mbron UNICEF-i: të drejtën për kohë të lirë për fëmijët. Është gjithashtu një mënyrë për të treguar se futbolli mund të mirëpresë të gjithë të rinjtë, pa elitizëm.”
Presidentja e UNICEF-it për rajonin Midi-Pyrénées, Odile Laurent-Mallet, u shpreh e entuziazmuar për këtë nismë në mbështetje të Konventës Ndërkombëtare për të Drejtat e Fëmijës (CRC): “Për ne, kjo përbën një mbështetje të vlefshme, në një kohë kur është gjithnjë e më e vështirë të mbledhim fonde, për shkak të kontekstit kombëtar dhe ndërkombëtar.”
Një kauzë që prek edhe kryetarin e bashkisë, Vincent Terrail-Novès: “Alain Giresse është një njeri me zemër, me vlera dhe bindje. Do t’i propozoj këshillit bashkiak që fusha kryesore e stadiumit të mbajë emrin e tij,” njoftoi ai.
Alain Giresse u emërua si selektor i Kombëtares së Kosovës më 23 shkurt 2022. Ai u shkarkua në qershor të vitit 2023. Gjatë mandatit të tij drejtoi Kosovën në 14 ndeshje, prej të cilave i kishte katër fitore, gjashtë barazime e katër humbje.
