Presidenti i Serbisë, Aleksandër Vuçiq ka reaguar pasi Policia e Kosovës ndaloi djalin e tij, Danilo, për shkak të bluzës me mbishkrimin provokues “dorëzimi nuk është opsion” që e mbajti gjatë festës së Vidovdanit.

Vuçiq ka ironizuar me kryeministrin Kurtin, duke thënë se në praninë e presidentit serb nuk është aq i guximshëm.

“E përgëzoj Albin Kurtin për kurajën e tij. Ai nuk është kaq i guximshëm kur është përreth meje, por në rregull. Kur dërgojnë të tjerët që të sigurojnë jetesën me fëmijët e të tjerëve, është në rregull. Danilo nuk është i vogël, është pak më trim se Albin Kurti”, ka thënë Vuçiq.

Sipas tij, një herë e një kohë, disa do të kishin frikë të zbrisnin atje me një bluzë me mesazhin “dorëzimi nuk është opsion“, por djali i tij kaloi nëpër Prishtinë dhe shkoi në Graçanicë vetëm t’iu lutur Zotit.