NATO njoftoi të premten planet për të forcuar mbrojtjen e krahut lindor të Evropës, dy ditë pasi Polonia rrëzoi dronë që kishin shkelur hapësirën e saj ajrore në veprimin e parë të njohur të këtij lloji nga një anëtar i aleancës perëndimore gjatë luftës së Rusisë në Ukrainë.
Varshava i ka portretizuar inkursionet me dronë si një përpjekje të Rusisë për të testuar aftësitë e Polonisë dhe NATO-s për t’u përgjigjur.
Të premten, Polonia hodhi poshtë sugjerimin e Donald Trumpit se inkursionet mund të kenë qenë një gabim, një kundërshtim i rrallë i presidentit të ShBA-së nga një prej aleatëve më të ngushtë evropianë të Uashingtonit.
Ministri i saj i Jashtëm i tha Reuters se Polonia shpreson që Uashingtoni do të ndërmarrë veprime për të treguar solidaritet me Varshavën.
Rusia tha se forcat e saj kishin sulmuar Ukrainën në kohën e inkursioneve me dronë dhe se nuk kishte ndërmend të godiste objektiva në Poloni.
Sekretari i Përgjithshëm i NATO-s, Mark Rutte, i quajti inkursionet “të pamatura dhe të papranueshme”.
“Nuk mund të lejojmë që dronë rusë të hyjnë në hapësirën ajrore aleate”, tha ai në një konferencë për shtyp ku njoftohej operacioni “Roja Lindore”.
Misioni, i cili fillon të premten në mbrëmje, do të përfshijë një gamë të gjerë asetesh që integrojnë bazat ajrore dhe tokësore.
Aleatët, përfshirë Danimarkën, Francën, Britaninë dhe Gjermaninë, janë zotuar për misionin, ndërsa të tjerë do të bashkohen, tha Rutte, duke shtuar se NATO ende po vlerësonte qëllimin e mundshëm pas inkursionit, shkruan Reuters.
