Napoli ka shënuar fitore me rezultat minimal 1-0 ndaj Romës në kuadër të xhiros së 13-të në elitën e futbollit italian.
Pjesa e parë ishte mjaft e qetë me Romën që po mbronte mirë hapësirat në mbrojtje duke ua lejuar posedimin në tërësi Napolit.
Me rezultat të barabartë 0-0 përfunduan 45 minutat e para të këtij ballafaqimi.
Napoli golin e fitores e shënoi në minutën e 54-të përmes Romelu Lukakut i cili realizoi për 1-0 pas asistimit të Giovanni Di Lorenzos.
Rasti më serioz për Romën në këtë takim erdhi në minutën e 66-të kur goditja me kokë e Artem Dobvyk u ndal nga traversa.
Me këtë fitore Napoli ngjitet sërish në krye të tabelës në kampionatin italian me 29 pikë të grumbulluara, një më shumë se Atalanta në vendin e dytë dhe Interi në vendin e tretë.
Roma në ndërkohë numëron 13 pikë dhe mban pozitën e 12-të në tabelë dhe duket se as ardhja e trajnerit Claudio Ranieri nuk ka ndikuar pozitivisht në rezultatet e tyre.
