Ministrja e Arsimit, Arbëri Nagavci, ka reaguar mbi dërgimin e atatutit të ri të Universitetit të Prishtinës nga partitë opozitare në Gjykatën Kushtetuese.

Kjo se pari është dërguar nga PDK-ja, ndërsa tashmë edhe LDK-ja ka vendosur që ta dërgojë, përcjell IndeksOnline.

Nagavci theksoi se ndryshimet e mëdha e pozitive që janë bërë së fundi në universitet kanë prishur rehatinë e atyre që dikur kanë kontrolluar vendimarrjen në UP.

Ajo tha se këto veprime të LDK-së, PDK-së dhe eksponentët e tyre duke tentuar ndërhyrjen në aktet dhe politikat e universitetit, cenojnë rëndë autonominë e universitetit sikurse që janë tentativë për rikthimin e UP-së hapa prapa ku ishte.

“Pas PDK-së, edhe LDK e paska dërguar statutin e ri të Universitetit të Prishtinës në Gjykatën Kushtetuese. Si gjithnjë të koordinuar për të penguar ndryshimet e mëdha, pozitive dhe reformat institucionale”, ka shkruar ministrja e Arsimit, Arbërie Nagavci.

“Si ministre e Arsimit dhe si qeveri kemi përkrahur Universitetin e Prishtinës dhe universitetet e tjera publike drejt vetërregullimit, avancimit të cilësisë dhe performancës, meritrokracisë si edhe autonomisë akademike. Dhe rezultatet janë evidente, të matshme e konkrete”, ka thënë ministrja Nagavci.

“Ndryshimet e mëdha e pozitive që janë bërë së fundi në universitet kanë prishur rehatinë e atyre që dikur kanë kontrolluar vendimarrjen në UP, atyre që sot në vend se t’u gëzohen rezultateve evidente, nuk zgjedhin mjet e rrugë për të penguar reformat. Këto veprime të LDK-së, PDK-së dhe eksponentët e tyre duke tentuar ndërhyrjen në aktet dhe politikat e universitetit, cenojnë rëndë autonominë e universitetit sikurse janë tentativë për rikthimin e UP-së hapa prapa ku ishte.

Por, kthim prapa nuk ka. Universiteti i Prishtinës do ta fitojë edhe këtë betejë dhe ngadalë por sigurt do të kthehet aty ku e ka vendin. Universitet me autonomi, integritet akademik e kredibilitet. Vend ku do të prodhohen kuadro cilësore e klanet joprofesionale dhe joparimore nuk do të kenë vend më.”