Koordinatori për Financa në kuadër të Kabinetit për Qeverisje të Mirë të PDK-së, Arben Mustafa, ka thënë se buxheti për vitin 2024 nuk do t’i mundësojë Kosovës zhvillim ekonomik dhe përmirësim të jetës së qytetarëve, raporton Scanner.
Mustafa ka treguar se me buxhetin për vitin 2024, Qeveria Kurti tejkalon 10 miliardë euro buxhet në administrim për katër vite, e përmes të cilit nuk ka arritur të realizoj asnjë projekt të madh për vendin.
“Kjo qeveri, ashtu siç e filloi mandatin, ashtu dhe po shkon drejt fundit të mandatit të saj qeverisës, duke bartur paratë e qytetarëve të Kosovës nga dora në dorë, por pa lënë asnjë gjurmë substanciale në përmirësimin e kushteve të jetesës për qytetarët e vendit. Pra, për katër vite qeverisje, kjo Qeveri pritet t’i shpenzojë deri në fund të mandatit mbi 10 miliardë euro taksa të qytetarëve, por nuk ka realizuar asnjë projekt madhor për qytetarët e vendit. Prandaj, shihet qartë se kjo Qeveri nuk ka asnjë plan për ta zhvilluar Kosovës dhe për ta përmirësuar jetën e qytetarëve”, ka thënë Mustafa.
Më tej, Mustafa ka thënë se edhe buxheti për vitin 2024 është vetëm për 3% më i lartë në krahasim me buxhetin e vitit paraprak. Sipas tij, kjo rritje kaq e ulët e buxhetit reflekton ngecjen e përgjithshme të ekonomisë së Kosovës gjatë kësaj periudhe, gjë e cila po reflektohet edhe në parashikime për rritje më të zbehtë të të hyrave dhe të shpenzimeve buxhetore.
“Buxheti i aprovuar dje, ngjashëm me buxhetet e viteve të fundit, nuk ofron asnjë perspektivë për një dinamikë më të madhe të zhvillimit dhe rritjes së mirëqenies së qytetarëve të Kosovës. Në krahasim me vitet paraprake, ky buxhet dallon vetëm për sa i përket ndryshimit të strukturës së buxhetit në dëm të investimeve kapitale dhe në favor të shpenzimeve për transfere dhe subvencione”, ka thënë Mustafa.
Mustafa ka treguar se në buxhetin për vitin 2024, shuma e alokuar për investime kapitale përfaqëson vetëm 26% të gjithsej shpenzimeve të planifikuara buxhetore, përderisa pjesëmarrja e shpenzimeve për subvencione dhe transfere ka arritur në 32.2%.
Nga gjithsej buxheti i paraparë për investime kapitale, 83% e buxhetit i takon projekteve të bartura nga vitet paraprake, ndërsa vetëm 17% është planifikuar për investime të reja kapitale në vitin 2024.
“Paaftësia e kësaj qeverie për t’i realizuar projektet ekzistuese kapitale dhe për të hartuar projekte të reja nënkupton: më pak infrastrukturë për tërheqje të investimeve dhe zhvillim të sektorit privat, më pak infrastrukturë dhe pajisje për përmirësimin e shërbimeve shëndetësore e arsimore dhe në përgjithësi, më pak zhvillim ekonomik e mirëqenie për qytetarët e Kosovës”, ka thënë Mustafa.
Koordinatori për Financa në KQM, ka thënë se orientimi kryesor i kësaj qeverie janë skemat e përkohshme dhe simbolike të subvencioneve.
“Kjo qeveri në vazhdimësi ka refuzuar propozimet tona për rritje të pensioneve në kushtet kur shpenzimet e jetesës janë bërë të papërballueshme për shkak të rritjes së çmimeve. Tani, në vend se të ofrojnë një zgjidhje të qëndrueshme duke ua rritur pensionet, këta i’a japin pensionistëve një lëmoshë të njëhershme prej 100 euro sa për t’i mbajtur shpresat e tyre të varura për ndonjë vendim për një lëmoshë tjetër nga Qeveria në të ardhmen”, ka thënë Mustafa.
Mustafa ka thënë se a është Qeveria Kurti e udhëhequr vetëm nga kalkulimet populliste për vota, tregon edhe diskrinimi i paparë deri më tani në ndarjet e buxhetit ndërmjet komunave ku qeverisë Lëvizja Vetëvendosje dhe komunave që qeverisen nga partitë tjera.
“Deputetët e Grupit Parlamentar të PDK-së në seancën e djeshme të Kuvendit kanë propozuar një numër të amendamenteve për ta ofruar sadopak këtë buxhet me nevojat reale që i ka vendi dhe qytetarët. Mirëpo, siç kanë refuzuar çdo propozim të opozitës, ngjashëm vepruan edhe dje duke i refuzuar të gjitha amandamentet e propozuara nga deputetët e opozitës”, ka thënë Mustafa.
Në mesin e amendamenteve të propozuara nga deputetët e PDK-së, por të refuzuara nga deputetët e Vetëvendosjes, ishin edhe amandamentet që kërkonin: rritjen e koeficientit të pagës për sektorin publik, siguriminin shëndetësor për Policinë e Kosovës, pensionet e parakohshme për Policinë e Kosovës dhe shumë amandamente tjera për projekte të nevojshme infrastrukturore në anë të ndryshme të Kosovës.
