Analisti politik Imer Mushkolaj, e akuzoi ministren e Ministrisë së Industrisë së Ndërmarrësisë dhe Tregtisë, Rozeta Hajdari, se ka gënjyer kur ka thënë se nuk e njeh afaristin Ridvan Muharremin, i cili është arrestuar nën dyshimet për keqpërdorim të rezervave shtetërore.

Mushkolaj në “Debat Plus” tha se Prokuroria duhet ta “zbuloj” se kush është Ridvan Muharremi dhe cili është roli i tij në MINT.

“Pse po nisesh prej pretendimeve të mediave e gazetareve, pretendimet e tyre janë pasu me arrestime dhe lëndë është në prokurori. Unë mundem të shkruaj të them janë humb 1 miliardë euro, nëse kam shpif paditmëni. Çështja është në prokurori, kemi kalu nga raportimet gazetareske, punë e madhe cka kanë raportu mediat. Për mua është e rëndësishme me vërtetu prokuroria se pse nuk është ardhë i gjithë gruri. Për mua është e rëndësishme të dalë përgjegjësia e ministrisë. Kush është Ridvan Muharremi, që u zgjodh nga ministrja, pse rrejti publikisht ministrja, që tha nuk e njoh, kurse avokati tha që është taku me ministren me zyrtarë të ministrisë, pse duhet me rrejtë. Kush është Ridvan Mujharremi, pse u zgjodh vetëm ai? A pati autorizim të shkoj në Turqi për grurë, a pati autorizim të shkoj në Poloni të negocioj për vaj”, tha ai.

Tutje Mushkolaj tha se i ftuari në “Debat Plus”, Armend Muja, është nga të vetmit e partisë në pushtet që del e mbron Qeverinë e Kosovës ne momente tejet të vështira.

 “Për fat të keq, Armendi është i vetmi që duhet me dalë në studio e me ia mbulu bërllokun Qeverisë, këtu nuk vjen as zonja Hajdari, as Nagavci, as Gërvalla, as Aliu, as Rizvanolli. Armendi është prej të rrallëve që përpiqet t’ia mbulojë bërllokun Qeverisë”, tha ai.