Presidentja e Kosovës, Vjosa Osmani zyrtarisht ka kërkuar nga Qeveria në detyrë që ta heqë tarifën prej 10 për qind për mallrat amerikane, kërkesë kjo që u tha se “do të shqyrtohet”. E njëjta, u bë edhe arsye për një përplasje publike mes Presidencës e Qeverisë, ku më i zëshëm nga këta të fundit ishte ministri në detyrë i Financave, Hekuran Murati.
Kërkesën e saj, Osmani e bëri publike përmes një shkrimi në llogarinë e saj në rrjetin social “X”, ku tha se ky është hap i rëndësishëm për të thelluar lidhjet me aleatin e Kosovës.
“Sot, zyrtarisht i kërkova Qeverisë së Kosovës që të pezullojë tarifat e importit për të gjitha produktet amerikane – një hap i rëndësishëm për të thelluar lidhjet ekonomike me aleatin tonë më të ngushtë dhe për të dërguar një mesazh të qartë: Kosova është e gatshme për një marrëdhënie më të fuqishme me Shtetet e Bashkuara, me një vizion të qartë që do t’i bënte të dyja vendet tona më të forta, më të sigurta dhe më të begata.”, ka shkruar Osmani, duke treguar efektet e këtij vendimi.
Ndaj kërkesës së shefes së shtetit i menjëhershëm ka qenë reagimi i ministrit të Financave, Hekuran Murati.
Ky i fundit e ka kritikuar presidenten Osmani për bërjen publike të kërkesës së saj. Sipas tij, kjo çështje është dashur të diskutohej larg mediave.
“Sot pas orarit të rregullt të punës, në lajme lexova që Presidentja e vendit i paska bërë kërkesë Qeverisë që të pezullojë tarifat ndaj produkteve me origjinë nga ShBA-të. Kërkesa në email ishte dërguar në adresë të Qeverisë në 17:39, ndërkaq kjo gjë ishte bërë publike në rrjetin social X në 17:42, veç 3 minuta më vonë. Secili shtet serioz, këto çështje i trajton larg mediave, dhe publiku njoftohet kur të merret vendimi. Për më tepër, politikat fiskale bien në fushëveprimin e ekzekutivit, konkretisht ministrisë përgjegjëse për financa” – ka shkruar ai.
Sidoqoftë, Muratit i është kërkuar që në vend të deklaratave të tilla, të ndërmarrë veprime dhe të heqë taksën.
E njëjta, po shihet se do të kishte rëndësi politike e diplomatike.
Ish-mbështetësi i kryeministri Albin Kurti, Bleron Baraliu, e ka kritikuar ashpër ministrin Murati.
“Hec mor’ hiqe tarifën mos shit filozofi të lakta! Ti po don me ia kushtëzu Shpisë s’Bardhë ‘tregtinë e lirë’ vetëm përmes marrëveshjes. Krejt eksporti amerikan në Kosovë nuk mjafton as sa me i pagu avokatët për draftim të marrëveshjes, e ti thua, ‘ja, duam marrëveshje’. Pastaj, flet për impakt: heqja e taksës do të ishte gjest i rëndësishëm taktik e diplomatik, o amater, jo çështje financiare. Në fund, Kosova duhet të mos ketë tarifa apo ketë vetëm tarifa reciproke, sikur ka vendosë Amerika së fundmi – çdo gjë tjetër është politikë regresive, protekcioniste që e dëmton qytetarin dhe vendin” – u shpreh Baraliu.
Ndërkohë, ish-kryetari i Prishtinës, Shpend Ahmeti ka thënë se heqja e tarifës 10 për qind për produktet amerikane ka rëndësi politike, pasi shtetet tjera po i reagojnë negativisht administratës Trump.
“Heqja e tarifës 10 përqind nga Kosova për prodhimet amerikane nuk ka fare rëndësi ekonomike për ShBA. Mirëpo, në kohën kur krejt reagimet e shteteve janë negative ndaj administratës së Trumpit, një vendim i tillë ka rëndësi politike për Trump. Prandaj është vendim i rëndësishëm” – ka shkruar ai.
