Kryetari i Lëvizjes për Bashkim, Valon Murati, ka thënë se Kosova e ka humbur një shans të mirë duke mos i dhënë përkrahje idesë së ripërcaktimit të kufijve.
Madje, neglizhimin e Kosovës ndaj kësaj ideje, Murati e ka quajtur “turp”, shkruan lajmi.net.
Ai ka thënë se ky projekt mund të kthehet sërish në tavolinën e bisedimeve, sepse përpjekjet tjera sipas tij do të dështojnë në process.
Postimi i Muratit:
Ne e kemi futur veten me këtë qasje në rrugë qorre. E kemi lëshuar për turpin tonë rastin historik të zgjidhjes së problemit shqiptaro-serb, përmes ripërcaktimit të kufijve. Pse kam besim që kthehet ky projekt? Sepse përpjekjet e tjera do të dështojnë në proces. Asociacioni do të dështojë në implementim nëse synohet realizimi i tij. Në fund të fundit nuk ka zgjidhje tjetër e cila do të funksiononte në mes të Kosovës dhe Serbisë.
