Ministri në detyrë i Financave, Hekuran Murati, ka reaguar sot pasi kreu i Komunës së Prishtinës ka njoftuar se ka dorëzuar kallëzim penal ndaj tij.
Ai e ka cilësuar këtë veprim si të pabazë dhe të motivuar politikisht.
Në reagimin e tij në Facebook, Murati ka kritikuar Ramën duke theksuar se Komuna nuk ka arritur ta miratojë buxhetin brenda afateve ligjore, dhe se sipas tij, kallëzimi penal është një përpjekje për të zhvendosur përgjegjësinë.
“Marrëzia e Përparim Ramës nuk paska kufi. Vetë ai nuk ka arritë me e miratu buxhetin e Komunës brenda afatit ligjor, dhe tash mendon me e hedhë fajin e dështimit personal tek të tjerët”, ka shkruar Murati.
Ai ka shtuar se kodi penal parasheh dënime për kallëzim të rremë, duke theksuar se kallëzimi është bërë në kohën e fushatës zgjedhore.
“Siç shihet nga data, kallëzimi është bërë më 7 tetor, gjatë fushatës zgjedhore. Dhe aty ka qenë edhe qëllimi”, ka shkruar ai, duke shtuar se tashmë fushata ka përfunduar dhe të gjithë duhet t’i rikthehen punës.
Ndryshe, kryetari i Komunës së Prishtinës, Përparim Rama, ka njoftuar sot se ka dorëzuar kallëzim penal në Prokurorinë Speciale ndaj ministrit në detyrë të Financave, Hekuran Murati, dhe disa zyrtarëve të tjerë, duke i akuzuar për bllokimin e alokimit të mjeteve financiare të komunës dhe shkaktimin e dëmeve në projekte dhe pagesa. Në dokumentin e publikuar, figuron data 07.10.2025.
