Vendimi i presidentit të Shteteve të Bashkuara të Amerikës , Donald Trump, për tarifë bazë 10 për qind për importet nga të gjitha vendet e botës, përfshirë edhe ato nga Kosova, ishte shkas i një përplasjeje të re midis presidentes Vjosa Osmani dhe qeverisë në detyrë.
Analisti politik, Artan Muhaxhiri, tha për Ekonomia Online se përplasjet publike mes zyrtarëve të lartë të dy institucioneve po e bëjnë të qartë për opinionin publik se raportet mes tyre nuk janë të mira dhe se tashmë ka nisur një lojë pozicionimi për zgjedhjen e presidentit të ardhshëm.
“Sa i përket përplasjes fejzbukiane të përfaqësuesve të qeverisë edhe të presidencës, mendoj që këto janë të rëndësishme në dy aspekte. Aspekti i parë është dhënia e indikacioneve të qarta për raportet jo të mira mes këtyre dy shtyllave të shtetit. Aspekti i dytë është që edhe presidenca, edhe qeveria dëshirojnë t’ia bëjnë të njohur opinionit publik këtë nivel të marrëdhënieve, sepse tashmë kanë filluar diskutimet për zgjedhjen e presidentit. Mendoj që është e nevojshme edhe nga dy palët që qytetarët të mos zihen në befasi edhe që të ketë një qartësim të plotë, kristalizim të raporteve, qofshin të mira, qofshin jo të mira, pasi nuk mund të hyjmë në procesin e zgjedhjes së presidentit apo presidentes së re me një mjegullim sa i përket mundësisë së rikandidimit të presidentes Osmani apo të gjetjes së një kandidature tjetër”, tha Muhaxhiri.
Sipas tij, fakti që përplasjet po ndodhin në rrjetet sociale dhe në media tregon mungesë lidershipi nga të dyja palët.
“Ky diskurs është jashtëzakonisht zhgënjyes, sepse bisedat e tilla, qartësimet e tilla, do të duhej të bëheshin në katër sy. Ekzistojnë mundësitë zyrtare që të bëhen këto, jo që të ketë një lloj spektakli edhe në media, pra që të zhvendoset fokusi nga raportet normale, zyrtare, institucionale që do t’i duhej t’i kishin presidentja Osmani dhe kryeministri Kurti, por ky është vullneti i tyre, kjo është qasja e tyre. Kjo i dobëson që të dy, edhe presidenten Osmani, edhe kryeministrin Kurti, pasi tregon një mungesë lidershipi dhe një mungesë të vullnetit për sjelljen normale politike”, tha ai.
Muhaxhiri kritikoi gjithashtu edhe vetë çështjen e tarifës ndaj SHBA-së, e cila shkaktoi këtë përplasje mes dy institucioneve kryesore të vendit. Ai e quajti vendimin absurd dhe të turpshëm për Kosovën.
“Është absurde që Kosova t’i vendos tarifë SHBA-së, pra është turp edhe për ata që e ka vendosur këtë tarifë, edhe për ata që e ka mirëmbajt këtë tarifë. Mendoj që realisht e ka zënë në befasi, pasi një vendim i tillë është dashur që të merret shumë më herët në kohën kur e gjithë bota ka folur për tarifa të presidentit Trump. Kosova është dashur ta bëjë e para hapin dhe të mos vijë deri te kjo situatë tepër e pakëndshme”, tha Muhaxhiri.
