Federata e Futbollit e Kosovës dhe sponsori i Superligës, Albi Mall vazhdojnë të ndajnë çmimin “Ylli i Javës”. Në xhiron e 7-të të Albi Mall Superligës ky çmim i ka takuar mesfushorit të KF. LLAPI, Muhamet Hyseni.

🙌🏼Komisioni i veteranëve të futbollit në përbërje: Muhamet Sylejmani, Selatin Jerliu, Fatmir Mehmeti, vendosi që epiteti i më të mirit për këtë xhiro t’i takojë sulmuesit te skuadrës llapjane, pasi në ndeshjen në udhëtim kundër FC Malisheva ishte lojtari më i dobishëm dhe efikas në fushë duke shënuar dy gola, duke i mundësuar kësisoj ekipit të tij që në minutat shtesë të fitojë 3 pikë të rëndësishme për ta ruajtur kreun e tabelës në Albi Mall Superliga.

Çmimin “Ylli i Javës” për futbollistin e K.F. Llapi Muhamet Hyseni e ndau Andi Sadiku, dizajner grafik në Albi Mall.

Pasi mori këtë çmim, Hyseni u shpreh i lumtur për vlerësimin duke premtuar spektakël golash edhe në xhirot e ardhshme, për faktin që skuadra e tij po tregon karakter të lartë.

“Jam jashtëzakonisht i lumtur që jam shpallur “Ylli i Javës”. Ky çmim realisht më motivon edhe më shumë për të punuar dhe realizuar edhe gola tjerë. Kemi nisur shumë mirë edicionin e ri dhe realisht jemi në rrugën e duhur për të arritur objektivat tona. Kam besimin maksimal të shtabit teknik, bashkëlojtarëve dhe tifozëve, gjë që u falënderohem në maksimum. Tifozëve u premtoj edhe gola tjerë që së bashku të arrijmë suksese”, ka thënë Muamet Hyseni për faqen zyrtare të FFK-së.