Trajneri Jose Mourinho insiston se Roma është një top skuadër edhe pa fitore me një atmosferë të shkëlqyeshme.
Tekniku portugez fitoi Ligën e Konferencës në sezonin debutues te Roma dhe tani ka mbërritur deri në çerekfinale të Ligës së Evropës.
“Mënyra më e lehtë për të përcaktuar një top klub është të thuash se ata fituan shumë dhe prandaj janë një klub i mirë. Por ka edhe top klube që nuk kanë fituar kurrë dhe janë të shkëlqyera për sa i përket dashurisë dhe ndikimit social”.
“Roma ka këtë bukuri të veçantë për ta, e cila është edhe më e jashtëzakonshme kur mediat lokale përpiqen të na ndajnë”, deklaroi fillimisht ai.
Tutje, “Special one” i falënderoi tifozët për mbështetjen e dhënë që kur mori drejtimin e klubit.
“Unë jam ai që duhet të falënderoj fansat për gjithçka që më kanë dhënë. Në aspektin social, njerëzit kanë nevojë për një pikë referimi, që nuk jam unë, por klubi. Kjo ndjeshmëri, kjo ndjenjë përkatësie, e familjes, kjo është ajo që më pëlqen këtu”.
“Tek Roma ka një ndjenjë të tillë ‘ne jemi të lumtur nëse fitojmë, pastaj nëse humbim jemi të trishtuar, por të paktën jemi bashkë”. Këtë e kupton në familje”, përfundoi ai.
Roma ndeshjen e radhës do ta zhvillojë në kuadër të Serie A, si nikoqir i Sampdorias.
