Ena Kadaj, motra e këshilltares së presidentes, Donika Kadaj Bujupit, ka hyrë në garë për deputete të Kuvendit.
Në zgjedhjet e 28 dhjetorit, Kadaj do të garojë në kuadër të partisë boshnjake “VAKAT”.
Ndërkohë, kandidimin e saj nuk e ka mirëpritur një ish deputete e kësaj partie.
Duda Balje ka thënë se garimi i Kadajt është qëllimisht për të keqpërdorur vendet e rezervuara për komunitetet joshumicë në Kosovë.
Ajo madje, garimin e Kadajt e ka lidhur si sulm i VAKAT karshi Baljes.
“Ky nuk është sulmi i parë nga VAKAT. Para dy zgjedhjeve, VAKAT ka marrë vota edhe nga komunat serbe dhe ka provuar të marrë vende me vota të serbëve. Tani po përpiqet edhe me zonjën Ena. Unë e respektoj, por nuk e njoh personalisht, nuk e kam parë kurrë në jetën time, dhe mendoj se ky veprim nuk është fer”, tha ajo.
E akuzave të Baljes, iu kundërpërgjigjen nga partia boshnjake.
Në një reagim në Facebook, thonë se Duda Balje po dëshiron të krijojë përçarje brenda komunitetit boshnjak, dhe se sipas tyre, nuk do të rrezikohen vendet e garantuara.
Reagimi i plotë i VAKAT:
Reagimi i Duda Baljës ndaj kandidaturës së Ena Kadajt paraqet një përpjekje tjetër për të devijuar vëmendjen nga thelbi dhe për të krijuar përçarje të panevojshme brenda komunitetit boshnjak. Për këtë arsye, është e rëndësishme të theksohen disa fakte kyçe.
Ena Kadaj është e lindur në Sarajevë. Ajo ka marrë emrin Ena sipas gjyshes së saj Tenzila, e lindur në Foçë, dhe prejardhjen e ka nga e ëma, Mirsada Kamberoviq, e lindur në Sarajevë. Jeton në Lindje. Familja Kamberoviq është një familje e respektuar e Sarajevës, e njohur për vlerat e saj morale dhe shoqërore. Daja i Ena Kadajt, vëllai i nënës së saj, Mirsad Kamberoviq, ishte pjesëmarrës në luftë dhe fitues i çmimit më të lartë të luftës – Lules së Artë. Për të gjitha këto fakte, Duda Balja i di shumë mirë, por i injoron me vetëdije.
Nga ana tjetër, do të ishte korrekte që Duda Balja t’i shpjegojë publikut se cili është, sipas kombësisë, Elldin Ugrali, i cili së fundmi është liruar nga detyra e zëvendësministrit nga kryeministri Albin Kurti, ndërsa detyrën e ushtronte në emër të SDU-së. Në profilin e tij personal në Facebook, emri i tij shkruhet në shqip – Elldin Uglari. Në boshnjakisht do të quhej Eldin Ugljari. Është po ashtu e rëndësishme të theksohet se Elldin Uglari ka qenë kandidat në listën e SDU-së në zgjedhjet e fundit qendrore, gjë që hap më tej pyetjen pse situata të tilla nuk paraqesin problem, ndërsa në të njëjtën kohë bëhen lehtësisht akuza në adresë të personave me prejardhje të qartë boshnjake.
Koalicioni Vakat nuk do të rrezikojë, dhe as nuk ka pasur ndonjëherë qëllim të rrezikojë, vendet e garantuara që i përkasin komunitetit boshnjak. Përfaqësimi politik i boshnjakëve mbetet prioriteti dhe obligimi ynë, pavarësisht përpjekjeve të individëve për të minuar integritetin dhe unitetin e komunitetit tonë.
Kryetari i Partisë Demokratike Boshnjake
Koalicioni Wakat
Rasim Demiri
6.12.2025
Prizren
