Ish-kryeministri i Kosovës, Agim Çeku, e quan “gabim të madh të qeverisë së Kosovës”, miratimin në lexim të parë të projektligjit për pagën minimale, i cili u kundërshtua nga veteranët e luftës së UÇK-së. Ai thotë se në lexim të dytë, kjo duhet përmirësuar.
“Po e shoh si gabim të madh të qeverisë së Kosovës. Një gabim i pakuptimtë. Një arsyetim i pakuptimtë. Një çështje e panevojshme, edhe si një injorim total i veteranëve të UÇK-së, i luftës së UÇK’së, një ndarje jo vetëm e veteranëve nga pjesa tjetër e shoqërisë por një ndarje e shoqërisë, kështu që unë uroj që ky gabim të përmirësohet sa më shpejt në leximin e dytë që të mos kalojë një gjë e tillë, sepse vërtetë është gabim”, tha Çeku.
“Është gabim sepse ekziston një ligj i cili thotë se veteranët minimum pagën minimale duhet ta marrin edhe tash po rritet paga minimale, po trajtohet si sukses, por në anën tjetër nuk po i përfshin të gjithë ata që kanë qenë deri sot të përfshirë në pagë minimale”, shpjegon ai për RTK-në.
“Është një ndarje, është një injorim, është një nënvlerësim, thjesht është një gabim shumë i madh”, tha Çeku.
