Në një përgjigje për Tëvë1 të pyetur nëse ende është në agjendë shërbimi ushtarak obligativ kanë thënë se duke parë zhvillimet e fundit të shteteve që kanë për qëllim destabilizimin janë duke punuar në konceptin e Mbrojtjes Gjithëpërfshirëse.
“Duke mare parasysh se viteve të fundit strategjia e luftës dhe interferimit në shtete me qëllim destabilizmin ka ndërruar dukshëm duke u bërë më hibrihde por dhe më konvencionale se kurrë, sigurisht konform këtyre rrethanave dhe politikat e Ministrisë së Mbrojtjes janë duke u zhvilluar. Për të mbuluar secilën fushë, si dhe për të përfshirë e aftësuar secilin qytetarë me njohuri bazike bazike sa i përket mbrojtjes, është duke u punuar në konceptin e Mbrojtjes Gjithëpërfshirëse”, thuhet nga Ministria e Mbrojtjes.
Kjo ministri ka thënë se duke pasur një shtet fqinj si Serbia me qasje agresive, në fokus ka qenë ngritja e kapacitete të FSK-së.
“Gjatë kësaj periudhe buxheti i ndarë për Ministrinë e Mbrojtjes është rritur për 195%, gjë që ka mundësuar që pothuajse të dyfishojmë numrin e përgjithshëm të ushtarakëve dhe shumëfishojmë investimet në blerjen e sistemeve më moderne të armatimeve, nga më pak se 4 milionë sa ishte për periudhën 2014-2020, në mbi 200 milionë investime për vetëm tre vite. Dronët Bajraktar janë vetëm njëra nga sistemet që FSK tashmë ka në dispozicion. Prandaj, mund të themi me siguri të plota se Forca e Sigurisë së Kosovës ka kapacitet të përmbush misionin e saj kushtetues në garantimin e sigurisë për qytetarët e Republikës së Kosovë dhe mbrojtjen e territorit të shtetit tonë sovran”, thuhet nga kjo ministri.
E të gatshëm për t’i shërbyer vendit po shprehen qytetarët.
“ Po unë mendoj se po, por edhe rinia, sepse bëhet më e disiplinuar , është parapërgatitje për jetë, paj nja gjashtë muaj kisha shkuar pse jo, kisha shkuar ma me qef” , thotë qytetari Gentian Hyseni.
Ndërsa, Ramadan Pireva, mendon se me prezencën e NATO-së në Kosovës, shërbimi i detyrueshëm ushtarak është i panevojshëm.
“ Sa i përket rinisë, rinia është aktive dhe do të punojnë dhe dë të japin jetën për këtë vend, se e kemi dhënë dhe trashëguar me shekuj. Mirëpo sa i përket ushtrisë të rregullt ajo derisa ta kemi NATO-në këtu”, thotë ai.
E ndryshe nga Kosova, po vepron Serbia. Shtabi i Përgjithshëm i Forcave të Armatosura të Serbisë ka nisur një iniciativë dhe i propozoi presidentit Aleksandër Vuçiq rikthimin e detyrimit për të shërbyer në ushtri deri në katër muaj.
Por njohësit e sigurisë, këto veprime të Serbisë, i shohin jo serioze.
“Unë nuk shoh ndonjë pasoj të madhe në regjion ose te na në raport me Kosovës, sepse në cilin objektiv të synuar apo skenar që kanë pasur të hartuar për të realizuar në Kosovë, ata kanë mundu të realizojnë për aq sa e kanë realizua përmes forcave të veta që i kanë në dispozicion pa hy në shërbimin ushtarak si i detyrueshëm”
Sipas Nuredin Ibishit, ushtria serbe po tenton përmes këtij ligji të rekruton ushtarak të rinj.
“Ushtria profesionale iu është vjetërsuar në sistem, edhe e vetmja mundësi i mbetët i rekrutimit të paralajmëruar. Opinioni nuk e ka pritur mirë në Serbi, këtë paralajmërim., tash pritet në vazhdë me siguri do të ketë kohë për t’u konstituuar pas zgjedhjeve në Serbi, institucionet në rend të parë parlamenti, mandej edhe çështja e krijimin të qeverisë ” ,thotë Ibishi.
Ministria e Mbrojtjes serbe, ditë më parë ka publikua në rrjetin e saj social facebook, pamje gjatë ushtrimeve të ushtarëve serbë, përgjatë kufirit Serbi – Kosovë, në Kapaonik dhe Nish.
