Ministria e Jashtme e Shqipërisë gjatë ditës së djeshme njoftoi se sot  në Tiranë do të mblidhen 24 delegacione nga vendet anëtare të Procesit të Berlinit.

Ky takim i paraprin samitit të 16 tetor.

Në takim sot mësohet se do të jetë edhe ministrat e Jashtëm të Serbisë e Kosovës,  Ivica Daçiç dhe Donika Gërvalla.

‘’24 delegacione nga vendet anëtare të Procesit të Berlinit do të mblidhen nesër në Tiranë, e premte 6 tetor 2023 në takimin e Ministrave të Jashtëm , i cili i paraprin Samitit të Procesit të Berlinit që do mbahet në Tiranë më 16 tetor 2023. Takimi do të drejtohet nga Ministri për Evropën dhe Punët e Jashtme, z. Igli Hasani. Në të do të marrin pjesë: Komisioneri për Zgjerimin i KE, Oliver Varhelyi, Përfaqësuesja e EAS, Angelina Eichhorst; Ministrat e Jashtëm të Kosovës, Malit të Zi, Maqedonisë së Veriut, Serbisë dhe Bosnjë Hercegovinës si dhe të vendeve anëtare të Procesit të Berlinit si Gjermania, Austria, Greqia, Hungaria etj. Pjesë e Procesit të Berlinit janë edhe RCC dhe RYCO’’, thuhet në njoftim.

Po ashtu është bërë e ditur se takimi do të ketë 2 sesione të cilat do të jenë të mbyllura dhe në fund Ministri Hasani, Ministrja gjermane Baerbock dhe komisioneri Varhelyi do të dalin në një konferencë të përbashkët për shtyp.